Hələ müharibədən əvvəl Prezident İlham Əliyevin rəhbərliyi ilə bütün sahələrdə islahatlara start verildi. İslahatlar çərçivəsində siyasi mühitdə, ictimai təşkilatlar, qeyri-hökumət təşkilatları, siyasi partiyalar və bir çox bu kimi institutlar arasında bağların möhkəmləndirilməsi və eyni zamanda, şəffaflaşdırılması, sağlam mühitin yaradılması istiqamətində addımlar atıldı.
×
Hələ müharibədən əvvəl Prezident İlham Əliyevin rəhbərliyi ilə bütün sahələrdə islahatlara start verildi. İslahatlar çərçivəsində siyasi mühitdə, ictimai təşkilatlar, qeyri-hökumət təşkilatları, siyasi partiyalar və bir çox bu kimi institutlar arasında bağların möhkəmləndirilməsi və eyni zamanda, şəffaflaşdırılması, sağlam mühitin yaradılması istiqamətində addımlar atıldı. Tez bir zamanda biz Prezident Administrasiyasında Siyasi partiyalar və qanunvericilik hakimiyyəti ilə əlaqələr şöbəsinin yaradılmasının şahidi olduq. Həmin şöbənin vasitəçiliyi ilə partiyaların bir yerə yığılması, partiyalar və hakimiyyət arasında dialoqa start verilməsi nəticəsində bu istiqamətdə sağlam mühitin formalaşmasına şahidlik edirik. Nəticə etibarilə mütəmadi olaraq siyasi partiyalar Prezident Administrasiyası tərəfindən işğaldan azad edilmiş torpaqlara səfərlər edirlər. Vaxtilə bir-birilərinə qarşı birmənalı münasibət bəsləməyən partiyalar arasında qeyri-formal dialoq mühiti yaranır. Əlbəttə ki, siyasi partiyaların 44 günlük müharibədən sonra aparılan quruculuq, abadlaşdırılma işləri, Şərqi Zəngəzur və Qarabağ torpaqlarındakı yenidənqurma işləri ilə tanış olması olduqca vacibdir. Nəzərə alaq ki, bəzən cəmiyyətdə xaricdən idarə olunan müxtəlif dairələr tərəfindən bəzi problemlər qabardılır və düzgün şərhlər verilmir. Biz əyani şəkildə burada yenidənqurma işlərinə şahidlik edirik. Düşünürəm ki, belə addımlar gələcəkdə müxalifət və iqtidar, siyasi partiyalarla hakimiyyət arasında dialoqun inkişafına töhfə verəcək.
Bu fikirləri Bakı Politoloqlar Klubunun rəhbəri, politoloq Zaur Məmmədov Zəngilana səfər çərçivəsində AZƏRTAC-a müsahibəsində söyləyib.
Onun sözlərinə görə, hər bir cəmiyyət üçün vacib əsaslardan biri ideoloji bağların möhkəmliyi, ideologiyanın sistemli şəkildə olmasıdır: “Biz bəzi ölkələrdə, o cümlədən MDB məkanında xarici aqressiya zamanı pərakəndəliyin siyasi partiyalar arasında, siyasi hakimiyyətlə mübarizənin daha da qızğınlaşmasına səbəb olduğuna şahidlik etdik. Eyni situasiyanı 1990-cı illərin əvvəllərində ölkəmizdə də müşahidə etmişik. Belə ki, həmin vaxtlar - Ermənistan Azərbaycan torpaqlarının bir hissəsini işğal etdiyi dövrdə kifayət qədər ciddi şəkildə siyasi qeyri-sabitlik hökm sürür, hakimiyyət uğrunda mübarizə gedir, siyasi partiyalar arasında intriqalar yaşanırdı. Baxmayaraq ki, həmin dövrdə də həmrəy olmaq və ümumi düşmənə qarşı mübarizə aparmaq lazım idi. 44 günlük müharibədən əvvəl birlik ölkəmiz üçün vacib idi. Ölkə başçısının uzaqgörənliyi nəticəsində hələ müharibə başlamazdan əvvəl həmrəyliklə nəticələnən dialoqlara start verilmişdi. Nəticədə müharibə dövründə siyasi partiyaların hər biri dövlətimizin başçısına dəstəyini ifadə etdi, hakimiyyətlə eyni mövqedə çıxış etdi. Vətən müharibəsindən sonra da eyni halın şahidi oluruq. Çünki müharibə bitsə də, Azərbaycana qarşı müxtəlif səpkilərdə informasiya mübarizəsi davam etməkdədir. Odur ki, həmin ideologiyanın vahid mərkəzdən idarə olunması olduqca vacibdir və uğurla həyata keçirilir”.