Azərbaycan ilə Ukrayna arasında diplomatik əlaqələrin 30 illiyinin qeyd olunması mühüm və əlamətdar hadisədir.

Ölkələrimiz arasında əlaqələr hələ Azərbaycan Xalq Cüümhuriyyəti dövründə qurulub. Münasibətlərdə yeni mərhələ 1993-cü ildən başlayır. Hər iki ölkə bir-birinin ərazi bütövlüyünü dəstəkləyir. Ukrayna-Azərbaycan dostluğu illərin sınağından uğurla çıxıb. İnanıram ki, dostluğumuz daha da möhkəmlənəcək.

AZƏRTAC xəbər verir ki, bu fikirləri xarici işlər nazirinin müavini Xələf Xələfov fevralın 4-də Azərbaycanla Ukrayna arasında diplomatik əlaqələrin qurulmasının 30 illiyi münasibətilə keçirilən tədbirdə ifadə edib.

Xələf Xələfov deyib ki, ulu öndər Heydər Əliyevin siyasi kursunu uğurla davam etdirən Prezident İlham Əliyev Ukrayna ilə münasibətlərə böyük önəm verir. Dostluğumuzun təsdiqidir ki, Ukrayna Prezidenti Volodimir Zelenski 2019-cu il Bakıda olub və Azərbaycan Prezidenti İlham Əliyev bu il yanvarın 14-də Ukraynaya səfər edib. Səfər çərçivəsində iki ölkə arasında əlaqələrin müxtəlif sahələrdə inkişafı ilə bağlı məsələləri müzakirə edilib və mühüm sənədlər imzalanıb.

Ölkələrimiz arasında ticarət dövriyyəsinin həcminin artdığını vurğulayan nazir müavini siyasi, iqtisadi sahələrdən başqa, humanitar və mədəni sahələrdə də əlaqələrin inkişaf etdiyini diqqətə çatdırıb.

Diasporların və parlamentlərin ölkələrimiz arasında münasibətlərin dərinləşməsində rolundan bəhs edən X.Xələfov Xarkov və Şamaxıda diplomatik korpusların fəaliyyət göstərdiyini qeyd edib.