Mayın 15-də Milli Məclisin sədr müavini, parlamentin Gənclər və idman komitəsinin sədri Adil Əliyev ölkəmizdə səfərdə olan Ukrayna Ali Radasının sədr müavini Olena Kondratyukun başçılıq etdiyi nümayəndə heyəti ilə görüşüb.

AZƏRTAC xəbər verir ki, Adil Əliyev 2023-cü ilin Azərbaycanda “Heydər Əliyev İli” elan edilməsindən, ölkəmizdə Ümummilli Liderin 100 illik yubileyinin xüsusi təntənə ilə qeyd olunmasından, eyni zamanda, görkəmli dövlət xadiminin həyat və siyasi fəaliyyətindən danışıb.

Diqqətə çatdırılıb ki, Ulu Öndər Heydər Əliyevin şah əsəri olan bugünkü qüdrətli Azərbaycanın məhz Heydər Əliyev siyasi kursunun layiqli davamçısı Prezident İlham Əliyevin rəhbərliyi ilə daha da qüdrətlənib, öz torpaqlarını işğaldan azad edib.

Ukraynalı qonaqlara postmünaqişə dövründə regiondakı vəziyyət, işğaldan azad olunmuş ərazilərdə aparılan genişmiqyaslı quruculuq işləri, eyni zamanda, Ermənistanın qeyri-konstruktiv mövqeyi barədə də məlumat verilib.

Söhbət zamanı Azərbaycan ilə Ukrayna arasında parlamentlərarası əlaqələrin inkişafı məsələlərindən də söz açılıb.

Ukrayna Ali Radasının sədr müavini, nümayəndə heyətinin rəhbəri Olena Kondratyuk ölkəsinə göstərdiyi humanitar yardımlara görə Azərbaycan dövlətinə və xalqına minnətdarlığını bildirib, iki ölkə arasında əlaqələrin genişləndirilməsi ilə bağlı fikirlərini bölüşüb.

Görüşdə çıxış edən Milli Məclisin deputatı Erkin Qədirli ölkələrimizin tarixlərindəki oxşarlıqlardan danışıb.

Söhbət qarşılıqlı maraq doğuran məsələlərin müzakirəsi ilə davam edib.