COVID-19 dünya ölkələrinin səhiyyə sisteminə təzyiqlər göstərməkdədir. Ümumdünya Səhiyyə Təşkilatı vaksinlərin paylanması ilə bağlı statistikanı açıqlayıb. Yüksək gəlirli ölkələrdə hər 100 nəfərə 133 doza vaksin düşdüyü halda aşağı gəlirli ölkələrdə bu rəqəm 4-ə bərabərdir. Belə bir şəraitdə pandemiya ilə mübarizə aparmaq çətinləşir.

AZƏRTAC xəbər verir ki, bunu səhiyyə nazirinin birinci müavini, səhiyyə nazirinin vəzifələrini müvəqqəti icra edən Teymur Musayev VIII Qlobal Bakı Forumunun "İctimai səhiyyə və insanların vaksinasiyası" panel müzakirələrində çıxışı zamanı deyib.

T.Musayev bildirib ki, Prezident İlham Əliyevin apardığı uğurlu siyasət və beynəlxalq münasibətlər nəticəsində Azərbaycan lazımi miqdarda vaksin alıb. Milli Vaksinasiyası Strategiyası hazırlanıb və ölkədə yanvarın 18-dən peyvəndləmə prosesi başlayıb. Əhalinin hədəf qruplarının 60 faizi peyvəndlənib.

Vaksinlərin ədalətsiz paylanması çox ciddi qərarlar qəbul edilməsini şərtləndirir. Azərbaycan ilk gündən “vaksin millətçiliyinə” qarşı mübarizə aparır. Təəssüf ki, hələ də dünyada “vaksin millətçiliyi” davam edir. Ümid edirəm ki, dünya ölkələri peyvəndlərin ədalətli paylanmasına töhfə verəcəklər.

T.Musayev Azərbaycanda vaxtında görülən tədbirlər nəticəsində ölkədə COVID-lə bağlı vəziyyətin nəzarət altında olduğunu da diqqətə çatdırıb.