Mən Cəbrayıl rayonunun, eləcə də Dağtumas kəndinin 38 itkin ailəsi adından dünyaya səslənirəm. Qarabağda əsir düşən soydaşlarımız amansız işgəncələrə məruz qalıblar. Bizim əsirlərimiz barədə məlumatları dünya ictimaiyyəti bilməsin deyə ermənilər hər yola əl atıblar.

Bu sözləri AZƏRTAC-a müsahibəsində 1993-cü ildə döyüşlər zamanı itkin düşən Şəmsi Həmidovun bacısı Səkinə Həmidova deyib.

Bütün beynəlxalq təşkilatların xalqımıza qarşı amansızlıq törədən cani bir terrorçunun müdafiəsinə qalxdığını deyən S.Həmidova diqqətə çatdırıb ki, onlar bizim dörd minə yaxın itkinimizin taleyi ilə bağlı hələ də susqunluq nümayiş etdirirlər. “İşğaldan azad edilmiş ərazilərimizin demək olar hər yerində kütləvi məzarlıqlar var. Bu məzarlıqarın yerləri ermənilər tərəfindən gizlədilir. Bu millətin xisləti o qədər çirkindir ki, dünyaya bu formada tanınmaq istəmirlər. Əsir və itkin düşmüş, girov götürülmüş vətəndaşlarla bağlı dövlət komissiyası bu məsələlərlə bağlı əlindən gələn dəstəyini əsirgəmir. Mən dünya birliyini, BMT-ni, Avropa ölkələrini, erməniləri müdafiə edən ölkələrin və qurumların hamısını millətimizin başına gətirilən çirkin əməlləri araşdırmağa, hüquqlarımızın müdafiə olunmasına kömək göstərməyə səsləyirəm”, - deyə Səkinə Həmidova vurğulayıb.