"Amerika guşəsi" proqramı Azərbaycanda 2007-ci ildən bəri fəaliyyət göstərir. Bu, Bakı Amerika Mərkəzinin Azərbaycan Dillər Universitetində yaradılması ilə başlayıb. Hazırda proqram çərçivəsində Bakı, Gəncə, Xaçmaz, Salyan və Kürdəmirdə beş Amerika guşəsi fəaliyyətdədir.

AZƏRTAC xəbər verir ki, bu sözləri oktyabrın 4-də Azərbaycan Dillər Universitetində (ADU) ABŞ-ın ölkəmizdəki səfirliyi, Lənkəran Dövlət Universiteti və Azərbaycan Dövlət Pedaqoji Universiteti arasında imzalanan Anlaşma Memorandumu mərasimini açarkən ADU-nun rektoru, filologiya elmləri doktoru, professor Azərbaycan Respublikası Milli Elmlər Akademiyasının həqiqi üzvü Kamal Abdulla deyib. Bakı Amerika Mərkəzinin açılmasına Azərbaycan Respublikasının Birinci vitse-prezidenti Mehriban xanım Əliyevanın təşəbbüsü ilə başlanıldığını xatırladan Kamal Abdulla daha sonra oxşar strukturların yaradılmasının zəruriliyini vurğulayıb. O bildirib ki, zaman göstərdi ki, aradan keçən müddətdə Azərbaycan xalqı öz həqiqətlərini dünyaya bildirmək üçün bu Mərkəzin imkanlarından maksimum istifadə edə bildi. Azərbaycanın Zəfər müharibəsində əvvəl əldə etdiyi nailiyyətlərin də müxtəlif ölkələrə, o cümlədən Amerikaya yayılmasının təşkili işində bu Mərkəzin rolu az olmadı. Biz bilirik ki, Amerika xalqı Azərbaycanın həqiqətlərini bilir, duyur, dəstəkləyir və bu cür mərkəzlərin köməyi ilə həqiqətlərin Amerika müstəvisində yayılmasını alqışlayırıq.

ABŞ-ın ölkəmizdəki səfiri Erl Litzenberg 14 illik fəaliyyətdə olan Azərbaycan Dillər Universitetindəki Bakı Amerika Mərkəzində başladılan işin davam etdirildiyini diqqətə çatdırıb. Səfir imzalanacaq memorandumu başlanan işin davamı adlandıraraq ABŞ-ın Azərbaycandakı səfirliyi, Lənkəran Dövlət Universiteti və Azərbaycan Dövlət Pedaqoji Universiteti ilə imzalanan sənəd əsasında Lənkəranda və Şəkidə iki yeni Amerika guşəsi yaradılacağını bildirib.

Daha sonra memorandum imzalanıb.

Xatırladaq ki, bütün dünyada fəaliyyətdə olan Amerika guşələri ingilis dili təlimləri, təhsillə bağlı məsləhətlər, məişətlə əlaqəli təlimlər və informasiya sessiyaları da daxil olmaqla, bir neçə əsas layihəyə dəstək verir.