Azərbaycanın siyasi partiyalarının iqtidarlı - müxalifətli işğaldan azad olunmuş ərazilərə səfərləri artıq bir ənənə halını alıb. Bu birlik, əməkdaşlıq hələ müharibədən öncə başlayıb. Belə ki, xalq olaraq birləşməyimizdə, müharibədə qalib gəlməyimizdə dövlətimizin başçısının ətrafında yumruq kimi bir olmağımız çox kömək oldu.

Bu fikirləri AZƏRTAC-a Zəngilana səfər çərçivəsində müsahibə verən Milli Məclisin deputatı, Vətəndaş Həmrəyliyi Partiyasının sədri Sabir Rüstəmxanlı söyləyib. Milli Məclisin deputatı qeyd edib ki, bundan öncə üç belə səfər Ağdam və Şuşaya təşkil olunub. Bu gün isə bərəkətli, zəngin təbiəti olan Zəngilanda siyasi dialoqun davam etdirilməsi üçün toplaşmışıq. Zəngilanda siyasi dialoqun davam etdirilməsi bugünkü səfərin əhəmiyyətini daha artırır.

"Biz Zəngilana Ordumuzun azad etdiyi ərazilərlə gəldik. Bir daha əmin olduq ki, qəhrəman hərbçilərimiz hansı çətinliklərlə bu torpaqları düşmən işğalından azad edib. Hazırda isə Ağalı kəndində olan "Ağıllı kənd"lə tanış oluruq. Burada olmaq, qısa müddətdə dövlətimizin reallaşdırdığı işləri görmək qürurvericidir", - deyə partiya sədri bildirib.