Bakı region üçün əhəmiyyəti artmaqda olan tədbirlərin keçirildiyi mərkəzdir. Bakı təkcə regionda ən böyük olan bu sənaye tədbirinə ev sahibliyi etmir, eyni zamanda, gələn həftə baş tutacaq Formula 1 kimi beynəlxalq yarışın keçirildiyi məkandır.

AZƏRTAC xəbər verir ki, bunu Böyük Britaniyanın “ICA Group” şirkətinin İdarə Heyətinin məsləhətçisi Rassel Teylor 27-ci Beynəlxalq Xəzər Neft və Qaz Sərgisinin rəsmi açılış mərasimindəki çıxışında deyib.

Rassel Teylor Azərbaycan Prezidenti İlham Əliyevə Bakıda keçirilən sərgilərə verdiyi davamlı dəstəyə və bu mühüm sənaye tədbirinin açılışında ənənəvi olaraq iştirak etdiyinə görə dərin minnətdarlığını bildirərək deyib: “Bu, hər kəsə həm bu sənaye sahəsinin region üçün əhəmiyyətini və eyni zamanda, həmin sənaye sahəsinin daxilində bu tədbirin əhəmiyyətini göstərir”.