Ötən il sentyabrın 27-də Ermənistan silahlı qüvvələrinin törətdiyi genişmiqyaslı təxribatlara cavab olaraq Azərbaycan Ordusunun başladığı əks-hücum əməliyyatlarının 29-cu günü – oktyabrın 25-də Qubadlı şəhəri erməni işğalından azad edildi. Qubadlı şəhəri Vətən müharibəsi dövründə düşmən əsarətindən xilas edilən dördüncü şəhər idi. Cəbrayıl rayonunda düşmən qüvvələrinə sarsıdıcı zərbə vurulması və cənubda yerləşən Zəngilan rayonunda qısa müddətdə aparılan uğurlu əməliyyatlar Azərbaycan Ordusu bölmələrinin Qubadlı rayonunun inzibati hüdudlarına çıxmasına şərait yaratdı. Oktyabrın 20-də Zəngilan şəhəri azad olunandan sonra növbəti istiqamət Qubadlı idi. Qubadlı rayonunun azad edilməsi əməliyyatı bir neçə gün çəkdi. Şəhərdə güclü istehkamlar qurulmuş, yüksəkliklərdə düşmənin hərbi birləşmələri yerləşmişdi. Qubadlını azad etmək üçün, ilk növbədə, yüksəkliklər götürülməli idi. Çünki Ermənistan silahlı qüvvələrinin bölmələri həmin yüksəkliklərdən müntəzəm olaraq hərbçilərimizə atəş açır, Ordumuzun irəliləməsinə mane olurdu. Ona görə Qubadlı əməliyyatı xüsusi peşəkarlıq və fədakarlıq tələb edirdi. Azərbaycan Ordusunun illərdir əldə etdiyi hərbi biliklər, qazandığı praktiki vərdişlər və göstərdiyi əzmkarlıq əməliyyatın uğurla icra edilməsi ilə nəticələndi. Əvvəlcə şəhərə hakim olan yüksəkliklər götürüldü, ətrafda yerləşən kəndlər, o cümlədən Xanlıq qəsəbəsi, Padar, Sarıyataq, Mahmudlu kəndləri işğaldan azad edildi və strateji yüksəkliklər ələ keçirildi. Oktyabrın 25-də Azərbaycan Ordusu şəhəri düşməndən tam təmizlədi. Qubadlının azad edilməsi Laçın istiqamətində Ordumuzun yolunu açdı.

AZƏRTAC-ın müxbirləri Qubadlının azad edilməsində fədakarlıq nümunələri göstərən qəhrəman hərbçilərin bir neçəsi ilə həmsöhbət olub, onların xidmətləri ilə maraqlanıblar.

Vətən müharibəsi iştirakçısı Əsgər Hacıyev AZƏRTAC-ın əməkdaşları ilə söhbətində oktyabrın 20-dən 25-dək Qubadlı uğrunda döyüşlərdə iştirak etdiyini vurğulayaraq deyib: “Prezident, Müzəffər Ali Baş Komandan İlham Əliyevin əmri ilə Ordumuz düşmənin təxribatlarının qarşısını almaq üçün genişmiqyaslı əks-hücum əməliyyatına başladı. Ali Baş Komandanın bu əmri ilə bizim də vəzifə borcumuzu yerinə yetirməyimiz üçün imkan yarandı. Çünki ermənilər bizim torpaqlarımızı işğal etməkdən əlavə, qadınlarımızı, uşaqlarımızı, yaşlıları amansızcasına qətlə yetirmişdilər. Azərbaycan Ordusu 30 ilə yaxın müddətdə torpaqlarımızı işğal edən ermənilərə layiqli cavab verməklə yanaşı, xalqımızın başına gətirilən müsibətlərin də qisasını aldı. Apardığımız əks-hücum əməliyyatlarında yaralansam da, sevinirəm ki, torpaqlarımız uzun həsrətdən sonra əsl sahiblərinə qovuşdu. Vətən müharibəsində göstərdiyim şücaətə görə “Qubadlının azad olunmasına görə”, “Füzulinin azad olunmasına görə”, “Şuşanın azad olunmasına görə” və “Cəsur döyüşçü” medalları ilə təltif olunmuşam. Bundan sonra da canımı Azərbaycan üçün fəda etməyə hazıram”.

Əsgər İbrahim Sadıqov isə müharibə ilə bağlı xatirələrini bölüşərək qeyd edib: “Azərbaycan Ordusu Prezident, Müzəffər Ali Baş Komandan İlham Əliyevin rəhbərliyi ilə 44 gün ərzində uğurlu hərbi əməliyyatlar keçirərək təxminən otuz il işğal altında qalmış torpaqlarımızı azad etdi. Ermənistan silahlı qüvvələri nəinki açıq döyüşdə Azərbaycan Ordusu ilə bacara bilmədi, hətta düşmən hərbçiləri bütün silahlarını, nəqliyyat vasitələrini, ərzaqlarını qoyub qaçdılar. Düşmənin müqavimət göstərə bilməyib geri çəkilməsi bizdə ruh yüksəkliyini və özünəinamı artırdı. Ötən ilin oktyabrında bu ərazilərdə hər kənd, hər qəsəbə uğrunda şiddətli döyüşlər gedirdi. Addım-addım irəlilədikcə mən də daxil olmaqla Azərbaycan Ordusunun hərbi qulluqlarının özünəinamı hər keçən gün artırdı. Ordumuz yalnız irəli gedir, hər gün müxtəlif kəndləri, yaşayış məntəqələrini düşməndən təmizləyirdi. Bunun da məntiqi nəticəsi kimi oktyabrın 25-də Qubadlı rayonu düşmən işğalından azad olundu.

Qubadlı uğrunda döyüşüb, həm də burada xidmət etməkdən qürur duyduğunu vurğulayan İ.Sadıqov fikirlərini belə ifadə edib: “Bir əsgər üçün döyüşdüyü yerdə xidmət etmək qürurverici hissdir. Çünki insan uğrunda can verilən, qan tökülən, həmçinin azad edilməsində özünün də payı olduğu bir torpaqda xidmət edəndə fərəhlənir. Azərbaycan xalqı həm müstəqillik, həm də ərazi bütövlüyü uğrunda minlərlə şəhid verib. Şəhidlərimizin qanı ilə yoğurulan torpaqlara düşmən ayağının dəyməsinə heç vaxt imkan verməyəcəyik”.

Qubadlı şəhərinin mühüm strateji mövqedə yerləşdiyini vurğulayan mayor İbrahim Əliyev bildirib ki, burada strateji yüksəkliklər olduğu üçün qonşu rayonlara nəzarət etmək daha rahatdır. Buna görə də düşmən Qubadlını itirməyi qəbul edə bilmirdi. Bu səbəbdən Qubadlı uğrunda şiddətli döyüşlər gedib. Rəşadətli Azərbaycanın Ordusu güclü müqavimətlə qarşılaşmasına baxmayaraq, düşmənin nəinki dirənişini, hətta belini qıraraq əzəli torpaqlarımızı azad etdi. Ordumuz düşmənə elə zərbə vurdu ki, onlar canlarını qurtarmaq üçün təkcə döyüş sursatlarını, texniki vasitələrini deyil, məhv edilən hərbi qulluqçularının cəsədlərini və yaralananları da döyüş meydanında qoyub qaçırdılar.

Mayor İbrahim Əliyev Vətən müharibəsi ilə bağlı xatirələrini bölüşərkən bir məqamı xüsusi vurğulayıb: “Qubadlıya yaxın ərazidə mühüm bir yüksəkliyin alınması şəhərə tam nəzarət etmək imkanı yaradırdı. Yuxarı komandanlıqdan həmin yüksəkliyin mütləq ələ keçirilməsi ilə bağlı tapşırıq verildi. Bu yüksəklik uğrunda ağır döyüşlər getdi. Şəhidlərimiz, yaralılarımız olmasına baxmayaraq, yüksəkliyi düşməndən azad etdik. Bundan sonra düşmənin müqaviməti qırıldı və onlar Qubadlını boşaltdılar. Hazırda isə Azərbaycan Ordusu burada - Qubadlıdadır. Şəhidlərin və yaralıların canı-qanı bahasına azad edilən bu torpaqlarda, həmçinin bizim də uğrunda döyüşdüyümüz yerdə xidmət etmək unudulmaz, qürurverici hisslərdir. Biz Qubadlını göz bəbəyimiz kimi qoruyuruq. Bir daha düşmən ayağının bu müqəddəs torpaqlarımıza dəyməsinə imkan verməyəcəyik”.

Qubadlının işğaldan azad edilməsi əməliyyatından danışan baş leytenant Emin Abdullayev bildirib: “Qubadlı uğrunda döyüşlər zamanı qrupumuza şəhərin mərkəzindən on kilometr məsafədə mühüm mövqedə yerləşən kəndin düşməndən azad olunması tapşırığı verildi. Tapşırığa uyğun olaraq, kəndi işğaldan azad etmək üçün hücuma keçdik. Həmin istiqamətdə pusquya düşdük və bir şəhidimiz oldu. Lakin çətin vəziyyətdən uğurla çıxaraq, düşmənin müqavimətini qırdıq və həmin mövqeni ələ keçirdik. Qubadlı rayonu azad olunandan sonra digər istiqamətlərdə də döyüşlərdə iştirak etdik. Ermənistan ordusu məğlub olacağını müharibənin ilk günlərindən dərk etməyə başlamışdı. Rəşadətli Azərbaycan Ordusu 44 gündə istədiyinə nail oldu və düşməni təslim olmağa məcbur etdi.

Uğrunda döyüşdüyüm torpaqlarda xidmət etməyin xüsusi önəmi var. Burada həm döyüşmək, həm də xidmət etmək böyük şərəfdir. Biz ata-baba yurdumuzu düşməndən azad etdik, onların ruhu qarşısında vəfa borcumuzu yerinə yetirdik”.