Martın 15-də işini davam etdirən XIII Qlobal Bakı Forumu çərçivəsində "The Economist" jurnalının birgə təşkilatçılığı ilə “Cənub-Şərqi Avropa və Trans-Xəzər Biznes Sammiti” keçirilib.

AZƏRTAC xəbər verir ki, “Enerji və infrastruktur sahəsində tərəfdaşlıq naminə dəhlizlərin genişləndirilməsi” mövzusunda təşkil olunan panel müzakirəsində Nizami Gəncəvi Beynəlxalq Mərkəzinin həmsədri İsmail Serageldin, Serbiyanın sabiq Prezidenti Boris Tadiç, BMT Baş Assambleyasının 75-ci sessiyasının sədri Volkan Bozkır, Haitinin keçmiş Baş naziri Cozef Contue, Sülhü əks etmə qrupunun həmsədri, Beynəlxalq və Avropa Məsələləri İnstitutunun üzvü Frank Odannell (İrlandiya), Dünya İncəsənət və Elm Akademiyasının Baş katibi Conani Ramanatxan və başqaları çıxış ediblər.

Qeyd olunub ki, son 10 ildə dünyada böyük transformasiyalar baş verib, iqlim dəyişmələri, qlobal və regional xarakterli silahlı münaqişələr dünya düzənini pozub. Qlobal Cənubla yanaşı, Qlobal Şimalda da insanların təhlükəsiz yaşaması problemə çevrilib.

Müasir texnologiyaların sürətli inkişafı bir tərəfdən cəmiyyətin sosial-iqtisadi inkişafına təkan verirsə, digər tərəfdən müharibələr üçün alətə çevrilir. Bütün bunlara görə də bu gün dünya liderləri birləşib sistemli problemlərin həlli yollarını tapmalı, sülh və təhlükəsizliyin təmin olunması üçün ciddi səylər göstərməlidirlər. Bu birliyi yaratmaq üçün beynəlxalq təşkilatlarla əməkdaşlıq daha da genişləndirilməlidir.

Müzakirələrdə enerji sahəsində əməkdaşlıq məsələlərinə də toxunulub. Məsələ ətrafında Ekvadorun keçmiş xarici işlər naziri, BMT Baş Assambleyasının 73-cü Sessiyasının Prezidenti Maria Fernanda Espinoza, Ərəb Liqasının keçmiş Baş katibi Əmr Musa, İsveçrə Beynəlxalq Əlaqələr İnstitutunun vitse-prezidenti David Sikvaidze, Gürcüstanın Baş nazirinin keçmiş müavini Eka Tkeselaşvili və başqaları çıxış ediblər.

Diqqətə çatdırılıb ki, iqlim dəyişmələrinin qarşısını almaq üçün karbon emissiyasını azaltmaq və atmosferə digər zəhərli qazların tullantısını dayandırmaq olduqca vacib məsələdir. Buna nail olmaq üçün alternativ enerji mənbələrindən enerji istehsalını artırmaq, bu sahəyə sərmayə yatırımını təşviq etmək zəruridir.

Azərbaycan bu gün qlobal xarakterli layihələr həyata keçirməkdədir. Hazırda Azərbaycan Avropanın enerji təhlükəsizliyinin təmin olunmasında mühüm rol oynayaraq 16 ölkəyə təbii qaz ixrac edir. Bununla yanaşı, Azərbaycan Mərkəzi Asiya ilə Avropa arasında körpü funksiyasını yerinə yetirərək, Mərkəzi Asiya ölkələrində istehsal olunan alternativ enerjini “Köhnə qitə”yə tranzit olaraq ötürməyə hazırlaşır. Xəzər dənizi ilə Qara dənizi birləşdirəcək enerji dəhlizi qlobal enerji təminatına verilən böyük töhfədir.

Digər panellərdə Yaxın Şərqdə baş verən müharibə və onun həlli yolları, müasir şəhərsalma metodları, informasiya texnologiyalarının inkişafı və süni intellektin cəmiyyətin həyatına təsiri və bir sıra başqa aktual məsələlər müzakirə olunub, fikir mübadiləsi aparılıb.