Bu gün Yeni Azərbaycan Partiyasının təşkilatçılığı və İqtisadi İslahatların Təhlili və Kommunikasiya Mərkəzinin tərəfdaşlığı ilə Böyük Qayıdış Dövlət Proqramının təqdimatı həyata keçirilir. Dövlət Proqramı Prezident İlham Əliyev tərəfindən qəbul edilib və işğaldan azad olunmuş ərazilərdə qarşıdakı 5 il ərzində dövlətimiz tərəfindən həyata keçiriləcək əsas istiqamətləri müəyyənləşdirir. Böyük Qayıdış Dövlət Proqramının 6 əsas prioriteti müəyyənləşdirilib, 25 fəaliyyət istiqaməti var və 600-dən artıq ilkin, aralıq və son nəticələr olmaq etibarilə indikatorlar müəyyənləşdirilib.

AZƏRTAC xəbər verir ki, bu sözləri İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı jurnalistlərə müsahibəsində söyləyib.

“Böyük Qayıdış Dövlət Proqramı çərçivəsində, ilk növbədə, ərazilərin minalardan təmizlənməsi və işğaldan azad olunmuş ərazilərdə təhlükəsiz həyatın təmin edilməsi həyata keçiriləcək. Proqram qəbul olunan zaman 57 min hektardan artıq ərazi minalardan təmizlənmişdi. Növbəti beş il müddətində 280 min hektar ərazinin minalardan təmizlənməsi planlaşdırılır. Minalardan təmizləmə ilə yanaşı, infrastruktur quruculuğu həyata keçiriləcək və istər avtomobil, istər dəmir yolları, istərsə də hava limanlarının tikintisi davam etdiriləcək. Ümumilikdə ərazilərin həm torpaq, həm əmlak, həm də su inventarizasiyası tamamlanacaq”, - deyə V.Qasımlı qeyd edib.