Mayın 18-də İqtisadi Əməkdaşlıq Təşkilatı Parlament Assambleyasının (İƏT PA) Üçüncü Ümumi Konfransının iştirakçıları (Azərbaycan, Türkiyə, Pakistan, Özbəkistan, Tacikistan parlament sədrləri, Qazaxıstan, Qırğızıstan parlament sədrlərinin müavinləri, üç beynəlxalq təşkilatın isə baş katiblər səviyyəsində) Şuşa şəhəri ilə tanış olublar.
×
Mayın 18-də İqtisadi Əməkdaşlıq Təşkilatı Parlament Assambleyasının (İƏT PA) Üçüncü Ümumi Konfransının iştirakçıları (Azərbaycan, Türkiyə, Pakistan, Özbəkistan, Tacikistan parlament sədrləri, Qazaxıstan, Qırğızıstan parlament sədrlərinin müavinləri, üç beynəlxalq təşkilatın isə baş katiblər səviyyəsində) Şuşa şəhəri ilə tanış olublar.
AZƏRTAC xəbər verir ki, qonaqların Şuşa ilə tanışlığı qala divarlarından başlayıb. Azərbaycan Respublikası Prezidentinin Şuşa rayonunda xüsusi nümayəndəsi Aydın Kərimov məlumat verib ki, Qarabağ xanı Pənahəli xan tərəfindən inşa edilən qala uzun müddət şəhəri xarici müdaxilələrdən qoruyub, alınmazlıq simvolu olub. İşğal dövründə qala divarları erməni vandalizminə məruz qalıb. Şuşa işğaldan azad edildikdən sonra burada təmir-bərpa işləri aparılıb.
İştirakçılar Şuşa şəhər mərkəzi meydanında Azərbaycan mədəniyyətinin tanınmış simaları Natəvan, Bülbül və Üzeyir Hacıbəylinin güllələnmiş heykəllərinə baxıblar.
Dünyaşöhrətli fotoqraf Reza Deqati Birinci Qarabağ müharibəsi zamanı şahidi olduğu hadisələr barədə danışıb, Şuşa şəhərinin erməni işğalından əvvəlki və sonrakı vəziyyəti haqqında ziyarətçilərə məlumat verib.
Qonaqlar daha sonra Aşağı və Yuxarı Gövhərağa məscidləri ilə tanış olublar. Məlumat verilib ki, 30 illik işğal dövründə bütün abidələr kimi, dini abidələr, o cümlədən məscidlər də erməni vandallığına məruz qalıb. Şuşa işğaldan azad olunandan dərhal sonra bu məscidlərdə təmir-bərpa işlərinə başlanılıb.
Səfər iştirakçılarının Şuşada son dayanacağı Cıdır düzü olub. Onlar Cıdır düzündən açılan gözəl mənzərəni seyr ediblər.