Həştərxanda Ümummilli Lider Heydər Əliyevin anadan olmasının 100 illiyinə həsr edilmiş “Azərbaycan Respublikası və Həştərxan vilayəti arasında ticari-iqtisadi və humanitar əməkdaşlıq: müasir vəziyyət və perspektivlər” mövzusunda konfrans keçirilib.

AZƏRTAC xəbər verir ki, konfransı açan Rusiya Federasiyası Həştərxan vilayətinin vitse-qubernatoru Pavel Pautov bu il Ulu Öndər Heydər Əliyevin anadan olmasının 100 illiyinin Həştərxanda təntənəli şəkildə qeyd olunduğunu bildirib. O əlavə edib ki, konfrans sahibkarlara iqtisadi əlaqələr qurmağa və bütün istiqamətlər üzrə qarşılıqlı fəaliyyəti genişləndirməyə imkan verəcək. Hazırda bunun üçün bütün imkanlar mövcuddur.

Konfransda çıxış edən Azərbaycan Baş nazirinin müavini Şahin Mustafayev Azərbaycan xalqının Ümummilli Lideri Heydər Əliyevin 100 illik yubileyinə həsr olunmuş tədbirlərin təşkilinə görə Həştərxan vilayəti hökumətinə təşəkkürünü bildirib. “Biz bu təşəbbüsü xalqlarımız arasında dostluğun daha bir təzahürü kimi qiymətləndiririk. Biz Azərbaycan xalqının Ümummilli Lideri, müasir müstəqil Azərbaycanın memarı və qurucusu Heydər Əliyevin xatirəsinə göstərilən ehtirama görə vilayətin hökumətinə və bütün həştərxanlılara minnətdarıq. Heydər Əliyev iqtisadiyyatın dayanıqlı inkişafının möhkəm bünövrəsini qoyub və ölkənin beynəlxalq iqtisadi əlaqələr sisteminə dinamik inteqrasiyasını təmin edib”, -deyə Ş.Mustafayev vurğulayıb.

Müstəqilliyin bərpa edilməsindən sonra Ulu Öndərin qısa müddət ərzində Azərbaycan və Rusiya arasında münasibətləri yenidən nizama saldığını vurğulayan Ş.Mustafayev deyib ki, Prezident İlham Əliyev və Prezident Vladimir Putin ikitərəfli əlaqələri strateji tərəfdaşlıq səviyyəsinə qaldırıblar.

Ticari-iqtisadi əlaqələrdən bəhs edən Baş nazirin müavini qeyd edib: “2022-ci ilin yekunlarına görə bizim ticarət dövriyyəmiz dörd dəfə artıb. Lakin hesab edirik ki, bu rəqəm bizim iqtisadiyyatların inkişaf tempinə cavab vermir və mövcud iqtisadi potensialı əks etdirmir. Bu gün birmənalı şəkildə söyləmək olar ki, qarşılıqlı ticarəti artıqmaq üçün daha böyük potensial var, investisiya sahəsində qarşılıqlı fəaliyyəti gücləndirmək sahəsində yaxşı imkanlar müşahidə olunur.

Azərbaycanda çox əlverişli investisiya mühiti var. Ölkədə xarici investorun özünü rahat hiss etməsi üçün hərtərəfli şərait yaradılıb, Ələt Azad İqtisadi Zonası Həştərxan sərmayədarlarının diqqətini tam cəlb edə bilər. Burada investorlara unikal qanunverici baza, fiskal və qeyri-fiskal güzəştlər, əlverişli logistika və nəqliyyat infrastrukturu, həmçinin ixrac yönümlü istehsal üçün bütün lazımi infrasturkturla təmin edilmiş torpaq sahələri təklif olunur”.

Baş nazirin müavinin sözlərinə görə, biznes mərkəzləri iqtisadi və ticarət əlaqələrinin inkişafı üçün effektiv platformadır: 2018-ci ildə Həştərxanda Azərbaycan biznes mərkəzi, 2021-ci ildə isə Bakıda Həştərxan biznes mərkəzi açılıb. O əlavə edib: “Hesab edirik ki, bu mərkəzlərin əlaqələndirilmiş fəaliyyəti sahibkarlar arasında yeni əlaqələrin yaranmasına kömək edəcək və bir çox perspektivli layihələrin əsasını qoyacaq”.

Nəqliyyat-logistika sahəsində əlaqələrə toxunan Ş.Mustafayev bildirib: “Azərbaycan və Rusiya “Şimal-Cənub” beynəlxalq nəqliyyat dəhlizinin inkişafı və onun tam gücünə çatması istiqamətində birgə iş aparır. Bu kontekstdə Azərbaycan və Həştərxan viayəti arasında konteyner daşımalarının nizama salınmasının bəhrələrini qeyd etmək lazımdır. 2022-ci ilin yekunlarına görə, Azərbaycanla Həştərxan vilayəti arasında yükdaşıma dövriyyəsi 40 faiz artıb. Bu gün Bakı Limanının gücü 15 milyon ton quru yük və 100 min konteyner təşkil edir, lakin yüklərin həcmi sürətlə artır. Ötən il Azərbaycandan tranzit 75 faiz artıb və biz bu tendensiyanı nəzərə alaraq, limanın gücünü 25 milyon tona qədər və ildə bir milyon konteynerədək artırmaq üzərində işə başlamışıq. Biz Həştərxan tərəfinin liman infrastrukturunun yaxşılaşdırılması istiqamətində səylərini alqışlayırıq və daha yüksək nəticələr əldə etmək üçün gələcək əməkdaşlığa hazırıq”.

Baş nazirin müavini kənd təsərrüfatı, turizm və ticarət sahələrində əməkdaşlığın inkişafının da prioritet vəzifələr olduğunu bildirib.

Konfransda çıxış edən Həştərxan vilayətinin sənaye, ticarət və energetika nazirinin müavini Mixail Kabakov gəmiqayırma sahəsində əməkdaşlığın perspektivlərindən danışıb. O vurğulayıb: “Gəmiqayırma sahəsi bizim əməkdaşlığın sürətlə inkişafı üçün bir bazadır. Ötən ilin payızında bizim nazirimiz Bakıya səfər etdi, Azərbaycan Xəzər Gəmiçiliyinin rəhbərliyi ilə gəmiqayırma sahəsində əməkdaşlığın perspektivləri ilə bağlı fikir mübadiləsi apardı. Danışıqlar Həştərxanda davam etdirildi. Bu, Azərbaycan tərəfinin əməkdaşlıqda maraqlı olmasını göstərir. Ona görə də biz bu istiqaməti əməkdaşlığımızın genişləndirilməsi imkanı kimi görürük. Biz gələcəkdə zavodlarımız ilə öz müəssisələrimizdə korpuslar inşa edə, Azərbaycandakı gəmilərin inşasının başa çatdırılması prosesini həyata keçirə bilərik”.

Azərbaycanın iqtisadiyyat nazirinin müavini Sahib Ələkbərov qeyd edib ki, Heydər Əliyev dünyamiqyaslı şəxsiyyət, dahi siyasi və dövlət xadimi idi. Heydər Əliyevin insanlarla işləmək bacarığına malik olduğunu diqqətə çatdıran nazir müavini Ümummilli Liderin sözlərini sitat gətirib: “İqtisadiyyatı güclü olan dövlət hər şeyə qadirdir”.

Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov bildirib ki, Azərbaycan xalqının Ümummilli Lideri Heydər Əliyev ölkədə sahibkarlar üçün əlverişli biznes mühiti yaradılmasına böyük diqqət yetirirdi, hazırda Prezident İlham Əliyev tərəfindən də onlar üçün bütün lazımi şərait yaradılıb. O vurğulayıb: “Agentliyimiz tərəfindən sahibkarlıq fəaliyyətinin tənzimlənməsi sistemi üzrə ardıcıl islahatların həyata keçirilməsi və kiçik və orta sahibkarlığın effektiv koordinasiyası, həmçinin rolunun artırılması və rəqabətqabiliyyətliliyi üçün hər cür şərait yaradılıb”.

Orxan Məmmədov əmin olduğunu bildirib ki, konfrans Azərbaycan və Həştərxan vilayətinin dövlət və özəl sektorları arasında əməkdaşlığın genişləndirilməsi, o cümlədən ticarət və invsetisiyalar üzrə tərədaşlığın inkişafı istiqamətində gələcək addımların müəyyən edilməsinə imkan yaradacaq.