İyunun 23-də Müdafiə Nazirliyinin Azərbaycan Hərb Tarixi Muzeyi, “Gənclərin Maarifləndirilməsinə Dəstək” İctimai Birliyi və Abbas Mirzə Şərifzadə adına Mədəniyyət Mərkəzinin birgə təşkilatçılığı ilə Azərbaycan Ordusunun yaradılmasının 105 illik yubileyinə həsr olunmuş “Zəfərin qazanılmasında Heydər Əliyev ideyaları” adlı yubiley tədbiri keçirilib.

AZƏRTAC xəbər verir ki, tədbirdə muzey rəisi, ehtiyatda olan polkovnik Əzizağa Qənizadənin, İctimai Birliyin sədri Aynurə Salmanlının Ordumuzun yaradılması və 105 illik inkişaf tarixinə həsr edilmiş məruzə və çıxışları dinlənilib.

Qeyd olunub ki, 1918-ci il mayın 28-də müsəlman Şərqində ilk demokratik respublika olan Azərbaycan Xalq Cümhuriyyəti Hökumətinin 1918-ci il 26 iyun tarixli qərarı ilə Müsəlman Korpusunun adı dəyişdirilərək Əlahiddə Azərbaycan Korpusu adlandırıldı və bununla da Silahlı Qüvvələrin yaradılmasına başlandı. Həmin tarixdən indi 105 il ötür. Ümummilli Lider Heydər Əliyevin 1998-ci il mayın 22-də imzaladığı Fərmanla iyunun 26-sı Silahlı Qüvvələr Günü elan edildi.

Cümhuriyyət dövründə ordumuzun bir sıra uğurları oldu. 1920-ci ilin aprelində Azərbaycan Ordusu general-mayor Həbib bəy Səlimovun komandanlığı ilə Qarabağı erməni silahlı birləşmələrindən azad etmiş, Zəngəzurun azad edilməsi üçün hazırlıqlara başlamışdı. Ancaq bolşevik işğalı bu planları gerçəkləşdirməyə imkan vermədi və 23 aydan sonra Azərbaycan Xalq Cümhuriyyəti süqut etdi.

Xalqımız ən ülvi və müqəddəs arzu kimi qəlbində gəzdirdiyi dövlət müstəqilliyini keçmiş Sovetlər Birliyi tarix səhnəsindən silinməsindən sonra bərpa etdi.

Azərbaycan dövlətçiliyinin mövcudluğu və müstəqil inkişafına qarşı ən böyük maneə qonşu Ermənistanın ərazi iddiaları və Qarabağı ələ keçirmək niyyəti oldu. Xarici qüvvələrin və erməni diasporunun gücünə arxalanan İrəvan bir-birinin ardınca yeni dövrdə tarixi sınaqlara hazır olmayan Bakını çətin faktlar qarşısında qoydu.

“1993-cü il iyunun 15-də Ümummilli Lider Heydər Əliyev ölkəni dərin iqtisadi, siyasi böhrandan xilas etmək üçün Naxçıvandan Bakıya dəvət edildi və yalnız bundan sonra respublikada vəziyyət dəyişməyə başladı. Hər şeydən əvvəl sabitliyə nail olmaq naminə cəbhədə atəşkəs elan olunması barədə razılıq əldə edildi. Yavaş-yavaş həyatımızın bütün sahələrini əhatə etmiş böhran aradan qaldırıldı, Silahlı Qüvvələrdə intizamsızlığın, başıpozuqluğun qarşısı alındı, elmi əsaslarla və vahid komandanlıq prinsipi ilə idarə edilən intizamlı ordu quruculuğu prosesi başlandı.

İlham Əliyev hakimiyyətə gəldikdən sonra Ümummilli Lider tərəfindən hazırlanmış zəmin üzərində ölkənin dinamik inkişafı gerçəkliyə çevrildi. Dövlətimizin başçısı ordu quruculuğunu ölkə üçün prioritet vəzifə elan etdi və Silahlı Qüvvələrimizin maddi-texniki bazası ildən-ilə artmağa, güclənməyə başladı. Ancaq Azərbaycan xalqını həmişə narahat edən, ölkənin hərtərəfli tərəqqisinə yetərincə ciddi maneə yaradan məsələ Qarabağın Ermənistan silahlı birləşmələri tərəfindən zəbt edilməsi faktı idi. İşğal altında qalmış Vətən torpaqlarının azad edilməsi dövlət və onun rəhbərliyi üçün ən ümdə vəzifə olaraq qalmaqdaydı.

2020-ci il sentyabrın 27-də başlanan Vətən müharibəsi sonda Azərbaycanın tam Qələbəsi ilə nəticələndi. Otuz illik sülh danışıqları prosesində hər vəchlə Ermənistanın maraqlarının təmin edilməsinə cəhdlər olunurdu, ancaq Azərbaycan Ordusu yeni reallıq yaratdı”, - deyə Əzizağa Qənizadə vurğulayıb.

Yubiley tədbirində texnikalardan ibarət “Zəfər festivalı” adlı sərgi nümayiş olunub.

Abbas Mirzə Şərifzadə adına Mədəniyyət Mərkəzinin üzvlərinin ifasında bayram konserti keçirilib.