Dekabrın 11-də Azərbaycan Hərb Tarix Muzeyində Azərbaycan xalqının Ümummilli Lideri, görkəmli dövlət xadimi Heydər Əliyevin vəfatının 20-ci ildönümünə həsr olunmuş "Tarixin gedişini dəyişən şəxsiyyət" adlı anım tədbiri keçirilib.

AZƏRTAC xəbər verir ki, Azərbaycan Milli Elmlər Akademiyasının A.A.Bakıxanov adına Tarix İnstitutunun "Yeni tarix" şöbəsinin müdiri, Prezident mükafatçısı Hacı Həsənov, muzeyin tədqiqatçısı, baş elmi işçisi Vahid İsmayılov, “Qarabağ Qaziləri” İctimai Birliyinin müavini Ədalət Məmmədov, Şərifzadə adına Mədəniyyət evinin direktoru Ziyafət Əhmədova, Mədəniyyət Nazirliyi "Xatirə kitabı" baş redaksiyasının redaktoru Nəzakət Məmmədova və beynəlxalq Hərb Əməkdaşlıq İdarəsinin nümayəndələri iştirak ediblər.

Əvvəlcə mərasim iştirakçıları böyük şəxsiyyətin, eləcə də ölkəmizin müstəqilliyi və ərazi bütövlüyü uğrunda canlarını fəda etmiş bütün şəhidlərimizin əziz və unudulmaz xatirələrini bir dəqiqəlik sükutla anıb, qazilərə şəfa diləyiblər.

Muzeyin rəisi, ehtiyatda olan polkovnik Əzizağa Qəni-zadə deyib ki, Vətəninə, xalqına sədaqətlə xidmət etmiş Ulu Öndər Heydər Əliyev Azərbaycanın keçmişini yaşadan və gələcəyini müəyyənləşdirən müdrik dövlət xadimi idi. O, Azərbaycan gənclərinin əsl vətəndaş kimi formalaşmasında Heydər Əliyevin danılmaz əməyi, misilsiz xidmətlərindən danışıb.

Sonra Ümummilli Liderə həsr olunmuş videoçarx nümayiş olunub.

Tədbir iştirakçıları Heydər Əliyevlə bağlı xatirələrindən bəhs ediblər.