Avqustun 8-də Bakıda “Azərbaycan-Özbəkistan: əməkdaşlığın yeni üfüqləri” mövzusunda dəyirmi masa keçirilib.

AZƏRTAC xəbər verir ki, tədbir Azərbaycanın Beynəlxalq Münasibətlərin Təhlili Mərkəzi (BMTM) və Özbəkistanın Mərkəzi Asiya Beynəlxalq İnstitutu (MABİ) tərəfindən birgə təşkil olunub.

Azərbaycan-Özbəkistan əməkdaşlığının perspektivlərinə həsr olunan tədbirdə iki ölkə arasında əməkdaşlığın hazırkı vəziyyəti, ikitərəfli və çoxtərəfli əməkdaşlığın gələcək istiqamətlərinin müəyyənləşdirilməsi, habelə onların həyata keçirilməsi üçün konkret təklif və təşəbbüslərin işlənib hazırlanması kimi məsələlər müzakirə edilib. Tədbirdə Azərbaycan və Özbəkistan rəsmiləri, Mərkəzi Asiya ölkələrinin Azərbaycandakı diplomatik nümayəndəliklərinin təmsilçiləri, ekspertlər və ictimaiyyət nümayəndələri iştirak ediblər.

Dəyirmi masa iştirakçıları “Özbəkistan-Azərbaycan münasibətləri: müasir imkanlar və perspektivlər” və “Orta Asiya və Azərbaycan: sabitlik və davamlı inkişaf naminə qarşılıqlı əlaqələr” mövzuları ətrafında fikirlərini bildirib, təkliflərini səsləndiriblər.

BMTM-in İdarə Heyətinin sədri Fərid Şəfiyev açılış nitqi ilə çıxış edərək Azərbaycanın xarici siyasətində Özbəkistanın mühüm yer tutduğunu qeyd edib. O bildirib ki, 2022-ci ildə Azərbaycan Prezidenti İlham Əliyevin bu ölkəyə üç dəfə səfər etməsi ikitərəfli və çoxtərəfli münasibətlərin inkişafında mühüm rol oynayıb.

Mərkəzi Asiya Beynəlxalq İnstitutunun direktor müavini Şerzod Fayziyev iki ölkə arasındakı əlaqələrə toxunaraq, Azərbaycanın Özbəkistan üçün əhəmiyyətli tərəfdaş olduğunu vurğulayıb.

Özbəkistanın Azərbaycandakı səfiri Bahrom Aşrafxanov bildirib ki, ölkələrimiz siyasi, iqtisadi, mədəni, parlamentlərarası və digər sahələrdə uğurla əməkdaşlıq edir.

İki ölkə arasında münasibətlərin inkişaf perspektivlərinə toxunan Azərbaycanın Özbəkistandakı səfiri Hüseyn Quliyev ölkələrimiz arasında münasibətlərin qarşılıqlı etimada əsaslanan mehriban qardaşlıq xarakteri daşıdığını vurğulayıb.

Sonra BMTM-in aparıcı məsləhətçisi Nağı Əhmədov “Ümummilli Lider Heydər Əliyevin Özbəkistan-Azərbaycan əlaqələrinin inkişafında rolu” mövzusunda çıxış edərək, Ümummilli Liderin iki ölkə arasında diplomatik əlaqələrin qurulmasında və inkişafındakı rolundan danışıb.

Azərbaycanın Xarici İşlər Nazirliyinin Şərqi Avropa, Cənubi Qafqaz, Qərbi və Mərkəzi Asiya idarəsinin rəis müavini Zamin Əliyev son iki ilin ölkələrimiz arasında əlaqələrin inkişafı baxımından çox uğurlu olduğunu diqqətə çatdırıb. O, dövlətlərimizin başçıları arasında sıx təmas və dostluq əlaqələrinin ölkələrimiz arasında münasibətlərin inkişafında dinamizm və intensivliyi müəyyən etdiyini bildirib.

İkitərəfli münasibətlərin inkişafında parlamentlərarası əlaqələrin əhəmiyyətini vurğulayan Milli Məclisin deputatı Rauf Əliyev Özbəkistanın daim Azərbaycanın ərazi bütövlüyünü dəstəklədiyini qeyd edib.

Digər çıxış edənlər ikitərəfli münasibətlərin geosiyasi, iqtisadi, mədəni və sair aspektlərini geniş şərh ediblər. Onlar ikitərəfli münasibətlərin daha da inkişaf etdirilməsi ilə bağlı bir sıra təkliflər də səsləndiriblər.

Tədbirin sonunda BMTM ilə Mərkəzi Asiya Beynəlxalq İnstitutu arasında əməkdaşlıq haqqında Anlaşma Memorandumu imzalanıb.