Qazaxıstanın Azərbaycandakı səfirliyində Qazaxıstan Respublikasının Vətən Müdafiəçisi Gününə həsr olunmuş rəsmi qəbul mərasimi keçirilib.

AZƏRTAC xəbər verir ki, tədbirdə Azərbaycan Respublikası Hərbi Dəniz Qüvvələrinin komandanı, I dərəcəli kapitan Şahin Məmmədov və Azərbaycan Ordusunun digər zabitləri, həmçinin Azərbaycanda akkreditə olunmuş xarici ölkələrin hərbi attaşeləri iştirak ediblər.

Qazaxıstan Respublikasının Azərbaycandakı səfiri Alim Bayel tədbir iştirakçılarını Azərbaycan dilində salamlayaraq bildirib: "Bu gün Qazaxıstan və Azərbaycan strateji tərəfdaş və müttəfiqdirlər. Sevindirici haldır ki, əməkdaşlığımız digər sahələrdə olduğu kimi, hərbi sahədə də intensiv və uğurlu şəkildə inkişaf edir. Qeyd etmək istəyirəm ki, Qazaxıstan-Azərbaycan qardaşlığı əbədi olacaq".

O, çıxışını ingilis dilində davam etdirib: "1992-ci il mayın 7-də Respublika Prezidenti suveren Qazaxıstanın Silahlı Qüvvələrini təsis etdi. Həmin gündən bu tarix hərbi vəzifəyə sədaqətin, igidliyin, vətənpərvərliyin və xalqa xidmətin rəmzinə çevrilib. Bu gün biz Qazaxıstan Respublikasının müstəqilliyinin və suverenliyinin keşiyində dayananları hiss edirik. Biz Türk xaqanlığından, Qızıl Orda və Qazax xanlığından başlayaraq müasir Qazaxıstana qədər ölkəmizin müdafiəsinə həyatını həsr edən hər kəsə və bu missiyanı bu gün şərəflə yerinə yetirənlərə hörmətimizi bildiririk. Bizim strateji məqsədimiz heç vaxt qarşıdurma olmayıb. Məqsədimiz etimada əsaslanan, qarşılıqlı anlayış və bərabərhüquqlu tərəfdaşlığa əsaslanan davamlı əlaqələrin inkişafıdır. Qazaxıstan Respublikası beynəlxalq hüquqa, dövlətlərin suverenliyinə və kollektiv təhlükəsizlik prinsiplərinə əsaslanan sülhpərvər, balanslaşdırılmış və praqmatik xarici siyasət yürüdür. Bu gün ölkəmiz beynəlxalq sülh və sabitliyə töhfə verir".

Diplomat həmçinin bildirib ki, 80 il əvvəl bəşər tarixinin ən dağıdıcı müharibəsi başa çatıb: "Həmin müharibə zamanı Qazaxıstandan 1 milyon 200 mindən çox vətəndaş səfərbər olunmuşdu. Onlardan 600 mindən çoxu döyüş meydanlarında həlak oldu. Bu gün həmin müharibənin qəhrəmanlarını yad edərkən hər birinizə sülh və firavanlıq arzulayıram".

Tədbirin bədii hissəsində müxtəlif musiqi çıxışları, o cümlədən, azərbaycanlı dombraçı Adnan Əmirli və Qazaxıstandan "Səs Azərbaycan" yarışmasının iştirakçısı, müğənni Sanat Asuatın çıxışları təqdim olunub.

Hərbi-analitik "Global Firepower" portalının məlumatına əsasən, Qazaxıstan 2025-ci il üzrə hərbi güc reytinqində 145 ölkə arasında 57-ci yeri tutur. Bu, 2023-cü ildəki 63-cü yerə nisbətən irəliləyişdir.