Belarus Respublikasının Müstəqillik Günü münasibətilə Bakıda təntənəli rəsmi qəbul keçirilib.

AZƏRTAC xəbər verir ki, təntənəli rəsmi qəbulda Belarusun Azərbaycandakı fövqəladə və səlahiyyətli səfiri Dmitri Pineviç çıxış edib.

Baş nazirin müavini Şahin Mustafayevi, diplomatik korpusun nümayəndələrini, eləcə də tədbirin qonaqlarını salamlayan səfir vurğulayıb ki, Belarusun Müstəqillik Günü bayramı ölkənin faşizmdən azad edilməsi ilə bilavasitə bağlıdır və bu il əlamətdar bir zamanda - İkinci Dünya müharibəsində Qələbənin 80 illiyi ilə bağlı qeyd edilir.

Diplomat bildirib ki, Belarus xalqı müharibə illərində çox böyük itkilər verib. Ölkənin hər üç sakinindən biri həlak olub, 380 min insan alman əsiri olub. 209 şəhər yerlə-yeksan edilib, 12 mindən çox kənd, o cümlədən 288-i sakinləri ilə birlikdə yandırılıb.

Səfir qeyd edib ki, müharibə başa çatdıqdan sonra Belarus Azərbaycanla bir çox tarixi mərhələlərdən keçib. Bu il isə ikitərəfli diplomatik əlaqələrin 32 yaşı tamam olub. Həmin müddət ərzində əməkdaşlıq iki ölkənin liderləri - İlham Əliyev və Aleksandr Lukaşenko arasında çoxillik dostluq sayəsində strateji tərəfdaşlıq səviyyəsinə yüksəlib.

Dmitri Pineviç parlamentin “Azərbaycan-Belarus” Dostluq Cəmiyyətinin nümayəndələrinə, ali məktəblərin rektorlarına və Azərbaycanda Belarus dilinin tədrisi mərkəzlərinin rəhbərlərinə ayrıca minnətdarlıq bildirib.

Sonra Azərbaycan Respublikası Baş nazirinin müavini Şahin Mustafayev Belarus hökumətini bayram münasibətilə təbrik edib, onlara davamlı rifah, əmin-amanlıq və firavanlıq diləyib.

O, müstəqillik illərində Azərbaycan-Belarus münasibətlərinin əhəmiyyətli dərəcədə möhkəmləndiyini xatırladıb. Bu günə qədər ölkələr arasında 170-dən çox sənəd imzalanıb.

Baş nazirin müavini vurğulayıb ki, dövlət başçılarının - Prezident İlham Əliyevin və Prezident Aleksandr Lukaşenkonun siyasi iradəsi münasibətlərin dinamik inkişafının əsasıdır.

Şahin Mustafayev bildirib ki, 2024-cü ildə Minskdə İqtisadi Əməkdaşlıq üzrə Hökumətlərarası Komissiyanın 14-cü iclası uğurla keçirilib və bu iclasda tərəfdaşlığın genişləndirilməsi üzrə konkret addımlar müəyyən edilib.

O, Azərbaycanın Belarusla yaxın və dostluq münasibətlərinin davam etdirilməsinə sadiq olduğunu vurğulayaraq, strateji tərəfdaşlığın bütün istiqamətləri üzrə əlaqələrin daha da möhkəmlənəcəyinə əminliyini ifadə edib.

Qəbul çərçivəsində səfir qəhrəman döyüşçülərin yaxınlarına Belarus Prezidenti Aleksandr Lukaşenkonun təbriklərini – xatirə əsgər məktubları şəklində Sovet İttifaqı Qəhrəmanı Nəcəfqulu Rzayev, Sovet İttifaqı Qəhrəmanı Məlik Məhərrəmov, həmçinin 1944-cü ildə Homel bölgəsinin azad edilməsi zamanı döyüşdə həlak olan Cəlal Zamanovun “əsgər üçbucaqları”nı təqdim edib.

Sonra qonaqlar “Suveren Belarus” fotosərgisi, Belarusun azad edilməsi mövzusunda foto və videosüjetlərlə tanış olublar.

Tədbirdə Belarus mahnıları səsləndirilib, qonaqlara Belarus milli mətbəxindən təamlar təqdim olunub.

Qeyd edək ki, tədbirdə hökumətin rəsmi nümayəndələri ilə yanaşı, Azərbaycan Respublikasında akkreditə olunmuş səfirlər də iştirak ediblər.