Oktyabrın 4-də Beynəlxalq Münasibətlərin Təhlili Mərkəzində (BMTM) “Qars müqaviləsinin 100-cü ildönümündə Cənubi Qafqazda geosiyasi vəziyyət” adlı konfrans keçirilib.

AZƏRTAC xəbər verir ki, tədbirdə çıxış edən BMTM-nin İdarə Heyətinin sədri Fərid Şəfiyev Qars müqaviləsinin əhəmiyyətindən danışıb, bu sənədin hələ də qüvvədə olduğunu söyləyib. Ermənistanın Qars müqaviləsinin tələblərinə əməl etmədiyini bildirən Fərid Şəfiyev deyib: “Ermənistan öhdəlik sözünü qeyri-ciddi qəbul edir. Hələ bir il keçməyib, 10 noyabrda imzalanmış Bəyanatın 9-cu bəndində yer alan Zəngəzur dəhlizinin açılması ilə bağlı məsələni başqa istiqamətə yozmaq istəyirlər. Buradan da görünür ki, onlar üçün öhdəlik deyilən bir anlayış yoxdur”.

Türkiyə Prezident Administrasiyasının Xarici Siyasət və Təhlükəsizlik Komitəsinin üzvü, Türkiyə-Azərbaycan Dostluq, Əməkdaşlıq və Həmrəylik Vəqfinin sədri Aygün Attar bildirib ki, hələ Qars müqaviləsi imzalanan zamandan Ermənistan Türkiyəyə, Gürcüstana və Azərbaycana qarşı torpaq iddialarında olub. Bu müqavilə Ermənistana qarşı Azərbaycanla Türkiyəni güclü edən bir sənəddir. Şuşa Bəyannaməsi də Azərbaycan və Türkiyə münasibətlərinin yeni mərhələyə qədəm qoyması deməkdir. Bakı Bəyannaməsi isə Azərbaycan, Türkiyə və Pakistan parlament sədrlərinin bir araya gələrək imzaladığı sənəddir. Bakı və Şuşa bəyannamələri çox əhəmiyyətli sənədlərdir.

Daha sonra Azərbaycan və Türkiyədən olan mütəxəssislərinin iştirakı ilə panel müzakirələri keçirilib.