Martın 8-də Bakıda işə başlayan “Müxtəlifliyin qorunması: 2024-cü ildə islamofobiya ilə mübarizə” mövzusunda beynəlxalq konfrans bu gün öz işini aralıq sessiyalarla davam etdirir.

AZƏRTAC xəbər verir ki, konfransın son gününün aralıq sessiyalarından biri də “Cinslərə görə islamofobiyanın əsası: müsəlman qadınların təqib edilməsi və müqaviməti, cins və cəmiyyət” mövzusuna həsr olunub. Sessiyaya Beynəlxalq Münasibətlərin Təhlili Mərkəzinin İdarə Heyətinin üzvü Esmira Cəfərova moderatorluq edir.

Qeyd edək ki, "Müxtəlifliyin qorunması: 2024-cü ildə islamofobiya ilə mübarizə" mövzusunda beynəlxalq elmi konfrans Bakı Beynəlxalq Multikulturalizm Mərkəzi, Beynəlxalq Münasibətlərin Təhlili Mərkəzi, G20 Dinlərarası Dialoq Forumu və Bakı Təşəbbüs Qrupunun birgə dəstəyi ilə keçirilir.

Konfransda dünyanın 32 ölkəsindən alimlər, beynəlxalq təşkilatların ekspertləri, din xadimləri və qeyri-hökumət təşkilatlarından 130-dan çox nümayəndə iştirak edir.

Tədbirə G20 Sammitinin Dinlərarası Dialoq Forumunun prezidenti Kol Durham (ABŞ), İslam Əməkdaşlıq Təşkilatının (İƏT) Baş katibinin Siyasi məsələlər üzrə köməkçisi Yousef Aldobeay (Səudiyyə Ərəbistanı), ICESCO-nun Sivilizasiyalararası Dialoq Mərkəzinin direktoru Xalid Fəthəl Rəhman Omer Mohamed (Sudan), Avropa Kilsələr Konfransının İnsan hüquqları müdafiəçisi Elizabeta Kitanoviç (Serbiya) və digər tanınmış şəxslər qatılıblar.

Xatırladaq ki, hər il martın 15-i İslamofobiya ilə Beynəlxalq Mübarizə Günü kimi qeyd edilir.