Avropa İttifaqı (Aİ) və Avropa Şurasının (AŞ) “Yaxşı İdarəçilik üçün Tərəfdaşlıq (PGG III)” proqramının 2023-2027-ci illər üzrə üçüncü mərhələsi çərçivəsində Azərbaycanda həyata keçiriləcək yeni layihələrinin təqdimatı keçirilib.

AZƏRTAC xəbər verir ki, təqdimatda çıxış edən Avropa Şurasının Bakı ofisinin rəhbəri Petr Zix bu təşəbbüs çərçivəsində layihələrin reallaşması üçün investisiyanın 80 faizi Aİ, 20 faizini isə AŞ tərəfindən ayrıldığını söyləyib. O, həyata keçiriləcək layihələrin yaxşı idarəçilik, korrupsiya ilə mübarizə, qadınlara qarşı diskriminasiya və şiddətə qarşı mübarizə sahələrini əhatə edəcəyini deyib: “Azərbaycan, Ermənistan, Gürcüstan və Ukraynada ümumilikdə 21 layihə həyata keçirəcəyik. Dörd layihənin Azərbaycanda reallaşması nəzərdə tutulub. Eyni zamanda Azərbaycan 3 regional layihədə iştiraka dəvət olunub”.

Aİ-nin Azərbaycandakı nümayəndəliyinin rəhbəri Peter Mixalko qeyd edib ki, bu proqram “Şərq Tərəfdaşlığı” ölkələrinin qanunvericiliyinin, idarəçiliyin yaxşılaşdırılmasına və Avropa standartlarına uyğunlaşdırılmasına xidmət edir.

“Reallaşdırılan layihələrin effektiv nəticələri var. Biz Azərbaycan Xarici İşlər Nazirliyinə bu proqramın həyata keçirilməsində koordinasiya fəaliyyətinə görə təşəkkür edirik. "Yaxşı idarəçilik üçün tərəfdaşlıq" proqramının büdcəsi 2.5 milyon avrodur. Yeni layihələr ədalət mühakimələrini səmərəliliyinin və keyfiyyətinin güclənməsinə, bərabərliyin təşviqinə töhfə verəcək. Yaxşı idarəçilik stabilliyə, iqtisadi inkişafa aparır", - deyə P.Mixalko vurğulayıb.

Təqdimat mərasimində çıxış edən Azərbaycan Xarici İşlər Nazirliyinin Beynəlxalq İnsan Hüquqları Təsisatları ilə Əməkdaşlıq İdarəsinin rəisi Aysel Yaqubova ədliyyə hüquq sistemində reallaşan islahatlar barədə məlumat verib. O bildirib ki, Azərbaycan 2015-ci ildən bəri bu proqramın benefisiarları arasındadır: “Hesab edirik ki, bu proqram həm də Aİ və Avropa Şurasının əməkdaşlığının uğurlu nümunəsidir. Bu təşəbbüs Azərbaycanda reallaşan islahatları gücləndirmək və tamamlamaq xarakteri daşıyır”.

Qeyd edək ki, Azərbaycanda Aİ və AŞ tərəfindən birgə maliyyələşdirilən və ümumi büdcəsi 2,5 milyon avro olan 4 xüsusi layihə həyata keçiriləcək. Onlar proqramın əvvəlki mərhələlərinin nəticələri əsasında hazırlanıb və Azərbaycan qurumlarına iqtisadi cinayətlərin qarşısı almaq və mübarizə aparmaq, mediasiyanı təşviq etməklə məhkəmə islahatlarına dəstək vermək, bərabərliyi təşviq etmək, habelə qadınlara qarşı zorakılıq və məişət zorakılığının qarşısını almaq və onunla mübarizə aparmaq üçün institusional bacarıqların daha da gücləndirilməsində kömək etmək məqsədi daşıyır.

Azərbaycanın da iştirak etdiyi regional səviyyədə iqtisadi cinayətlərə qarşı mübarizə aparmaq, bərabərlik və ayrı-seçkiliyə yol verməmək, qadınların ədalət mühakiməsinə çıxış imkanlarını artırmaq üçün 3 layihə həyata keçirilir.