Paytaxtdakı 21 saylı Nəsimi-Binəqədi seçki dairəsinin bütün məntəqələrində səsvermə prosesi demokratik qaydada davam edir. Ərazidə yaşayan seçicilər axın-axın məntəqələrə gəlir, qeydiyyatdan keçəndən sonra öz səslərini istədikləri namizədə verirlər.

Dairə seçki komissiyasının sədri Çingiz Dadaşov AZƏRTAC-ın müxbiri ilə söhbətində deyib: “Dairədə 37 seçki məntəqəsi var, onun 23-ü Nəsimi, 14-ü Binəqədi rayonuna aiddir. Dairədə 48 min 631 seçici var. Onun 30 min 924 nəfəri Nəsimi, 17 min 707 nəfəri Binəqədi rayonundakı səsvermə məntəqələrində iştirak edir. Qeyd edək ki, məntəqələrin 12-də veb-kameralar quraşdırılıb. Seçki məntəqələrində komissiya üzvlərinin və müşahidəçilərin normal fəaliyyəti, seçicilərin öz səslərini sərbəst şəkildə həyata keçirmələri üçün hər cür şərait yaradılıb”.

Onun verdiyi məlumata görə, 21 saylı Nəsimi-Binəqədi seçki dairəsi üzrə yaşı 80-100 arası olan 1168 nəfər öz konstitusion hüququndan istifadə edəcək. Fiziki imkanları məhdud vətəndaşların səs vermələri üçün daşınan seçki qutusu müraciətlər əsasında ünvanlara çatdırılır. Həmçinin sərbəst hərəkət imkanı məhdud olan bir əlil öz istəyi ilə seçki məntəqəsində səs verməsi üçün əlil arabası ilə təmin edilir. 37 məntəqədə təxminən 1480 ünvana daşınan qutu aparılacaq. Bizim dairədə olan seçicilərdən 654 nəfəri öz ərizələrinə əsasən, başqa məntəqələrdə səs vermək üçün qeydiyyatdan çıxarılıb.