Fevralın 4-də Beynəlxalq Münasibətlərin Təhlili Mərkəzində (BMTM) “Erməni millətçi irredentizmi və Qarabağ müharibələri” adlı kitabın təqdimatı keçirilib.

AZƏRTAC xəbər verir ki, çıxış edən BMTM-in İdarə Heyətinin sədri Fərid Şəfiyev kitabda Azərbaycan-Ermənistan münaqişəsinin tarixi məqamlarına toxunulduğunu bildirib. Diqqətə çatdırıb ki, erməni diasporu hələ də qondarma soyqırımı və keçmiş münaqişə barədə bir sıra narrativləri davam etdirir. “Erməni millətçiləri dünyaya sübut etməyə çalışırlar ki, bütün məsələlər 1988-ci ilin fevralından başlayıb. Onlar, həmçinin xalqların öz müqəddəratını təyinetmə hüququna əsaslanaraq tarixi reallıqları ört-basdır etməyə çalışırlar. Ermənilərin hərəkatı "Miatsum”la başlayıb, bu da əslində, irredentizmdir”, - deyə o vurğulayıb.

Milli Məclis sədrinin müavini Musa Qasımlı Prezident İlham Əliyevin rəhbərliyi ilə hər bir azərbaycanlının arzuladığı məsələnin – torpaqlarımızın azad edildiyini, suverenliyimizin tam bərpa olunduğunu diqqətə çatdırıb. Bildirib ki, Azərbaycan Qarabağ məsələsini həll etmək üçün təkcə Ermənistanla savaşmadı. Vurğulanıb ki, bu gün Türk dünyası ilə birbaşa avtomobil və dəmir yolu əlaqələrimizin olmamasının səbəbi Qərbi Zəngəzurun Ermənistana verilməsidir. “Xarici ölkələrdən ermənilərin Azərbaycan torpaqlarına köçürülməsi əvvəldən planlaşdırılan ideyanın bir hissəsi idi. İndi də kilsə və qondarma soyqırımı erməni ideologiyasının iki əsas sütunudur",- deyə deputat əlavə edib.

AMEA-nın A.A.Bakıxanov adına Tarix və Etnologiya İnstitutunun elmi işlər üzrə direktor müavini İlqar Niftəliyev 1991-ci ildən sonra Azərbaycan tarixçilərinin Qarabağ məsələsi barədə xeyli kitablar yazdığını, araşdırmalar apardığını deyib. Qeyd edilib ki, təqdimatı keçirilən kitabda erməni millətçiliyinin irredentizmi xronoloji olaraq göstərilib. Ermənilər tarixin mühüm mərhələlərində anti-türk siyasətlərini və qonşularına qarşı ərazi iddialarını ortaya qoyub, öz niyyətlərini həyata keçirməyə çalışıblar.

Tarix və Etnologiya İnstitutunun böyük elmi işçisi Nazim Mustafa kitabın keçmiş Qarabağ münaqişəsinə yeni baxış olduğunu qeyd edib. N.Mustafa Qarabağ məsələsinin ermənilərin gündəliyindən heç vaxt çıxmadığını və bu barədə dövrün arxiv sənədlərinin mövcud olduğunu bildirib. O, tarixdə ilk erməni dövlətinin 1918-ci ildə qurulduğunu və bundan sonra erməni irredentizminin başladığını vurğulayıb. Tarixçi, eyni zamanda, Ermənistanın Azərbaycan torpaqlarını öz ərazisinə birləşdirmək səylərindən danışıb və bunun əvvəldən planlaşdırılan bir addım olduğunu vurğulayıb.

Beynəlxalq Münasibətlərin Təhlili Mərkəzinin şöbə müdiri, kitabın müəllifi Cavid Vəliyev qeyd edib ki, kitab bugünkü Azərbaycan-Ermənistan münasibətlərinin normallaşmasını və sülh danışıqlarının gələcəyini anlamaq üçün önəmlidir.

Qeyd edək ki, kitab “İrredentizm üçün müttəfiq axtarışı”, “Ermənistanda milli reabilitasiya dövrü və artan millətçilik”, “1965-ci il mitinqi və irredentizmin sürətlənməsi” və “Miatsum”a gedən yol” başlıqlı fəsillərdən ibarətdir.