Beynəlxalq təhlükəsizlik sisteminin yenidən formalaşdığı və ənənəvi dünya nizamının dəyişdiyi hazırkı mürəkkəb şəraitdə Türkiyə Respublikasında mayın 14-də keçiriləcək prezident seçkiləri mühüm tarixi hadisə hesab olunur.

AZƏRTAC xəbər verir ki, bu barədə Sosial Tədqiqatlar Mərkəzinin İdarə Heyətinin və Milli Məclisin İnsan hüquqları komitəsinin sədri Zahid Oruc "Türkiyədə prezident seçkiləri - 2023 Azərbaycan ictimai rəyində" mövzusunda keçirilən tədbirdə söyləyib.

O qeyd edib ki, seçkilərlə bağlı aparılan obyektiv ictimai rəy sorğularında əsas rəqiblərin tərəfdar sayı təxminən bərabər qiymətləndirilsə də, ölkə miqyaslı on üç seçkinin qalibi, iyirmi illik təcrübəsi və beynəlxalq siyasətdə fəal rolu ilə Rəcəb Tayyib Ərdoğanın öndə olduğu inkaredilməzdir.