Tibbi Ərazi Bölmələrini İdarəetmə Birliyinin (TƏBİB) tabeliyində fəaliyyət göstərən Yeni Klinikada icbari tibbi sığorta çərçivəsində ödənişsiz olaraq ilk dəfə icra olunan və cərrahiyyədə ən bahalı əməliyyatlardan biri sayılan aorta damarının (bədənin ən böyük damarı) anevrizmasının qapalı yolla bərpası, endovaskulyar stent qreft yerləşdirilməsi uğurla icra edilib.

AZƏRTAC xəbər verir ki, bu münasibətlə keçirilən infosessiyada TƏBİB-in icraçı direktorunun müşaviri Pərvin Əkbərov, Yeni Klinikanın direktoru Barat Yusubov və invaziv radioloq, invaziv radioloq Ağakişi Yəhyayev icra edilən əməliyyatla bağlı ətraflı məlumat veriblər.

TƏBİB-in icraçı direktorunun müşaviri Pərvin Əkbərov bildirib ki, cərrahi əməliyyat zamanı həkim Nicat Alışev, ürək-damar cərrahı Əlizamin Yusifli və A.Yəhyayev tərəfindən xəstənin qarın boşluğunu açmadan bud nahiyəsinin qasıq hissəsindən balaca kəsiklə süni damar yerləşdirməklə həyata keçirilib.

Yeni Klinikanın direktoru Barat Yusubov məlumat verib ki, artıq son iki gündə dörd xəstənin əməliyyatı həyata keçirilib və hər biri uğurla başa çatıb.

Əməliyyatlara rəhbərlik edən invaziv radioloq Ağakişi Yəhyayev əməliyyat prosesinin əks olunduğu görüntüləri nümayiş etdirərək diqqətə çatdırıb ki, qarın aortasının anevrizması - qarın damarlarının genişlənməsidir. Bu xəstəlik inkişafa meyillidir, diametri il ərzində orta hesabla 10 faiz arta bilər, bu da həmin damarların genişləndikcə partlamasına səbəb olur. Qarın aortasının anevrizması ölüm faizi kifayət qədər yüksək olan xəstəliklərdəndir. Həmçinin xəstəliyin açıq cərrahi müalicəsində bir sıra fəsad və travmatik vəziyyət müşahidə edilə bilər. Müasir dövrdə elm və texnikanın inkişafının tibb sahəsində özünü göstərməsi xəstəliyin cərrahi müalicəsinin artıq qapalı yolla icrasına şərait yaradıb.

Qeyd edilən riskləri minimum səviyyəyə endirən qarın aorta damarının anevrizmasının qapalı yolla bərpası artıq Yeni Klinikada icbari tibbi sığortanın xidmətlər zərfi çərçivəsində növbəti ildən mütəmadi olaraq həyata keçiriləcək.