Bugünkü aksiyamız Rusiya sülhməramlı kontingentinin müvəqqəti yerləşdiyi Azərbaycan Respublikası ərazilərində filiz və qeyri-filiz yataqlarının qeyri-qanuni, pərakəndə və nəzarətsiz istismar olunması ilə əlaqədar keçirilir. Yataqlar işğaldan əvvəlki dövrdə - 1958-ci ildən 1988-ci ilə qədər olan dövrdə Azərbaycan geoloqları tərəfindən öyrənilib. Kəlbəcər rayonunun ərazisində olan “Qızılbulaq” yatağının sahəsi iki kvadratkilometrə qədər ərazini əhatə edib. Həmin sahədə 13,7 ton qızıl ehtiyatı müəyyənləşdirilib. Ermənilər tərəfindən yataqların istismar işlərinə müxtəlif şirkətlər cəlb olunub. Həmin şirkətlər 2010-2012-ci illərdən başlayaraq fəaliyyət göstərib. Xüsusilə “Qızılbulaq” yatağında istismara daha tez başlanılıb. Həmin yatağın əksər hissəsinin istismar olunduğu ehtimal edilir. Əraziyə baxış keçirilməsi və monitorinq aparılması nəticəsində dəymiş zərər müəyyənləşdirilə bilər.

Bunu AZƏRTAC-a müsahibəsində Milli Geoloji Kəşfiyyat Xidmətinin şöbə müdiri, baş geoloq Şahin Ataşov deyib.

Baş geoloqun sözlərinə görə, bununla yanaşı, Tərtər rayonu ərazisindəki “Dəmirli” mis-molibden yatağı və onun ətrafında yerləşən “Gülyataq” və “Canyataq” təzahürlərinin ərazilərində də istismar işlərinə başlanılıb. Həmin ərazilərdə də geniş sahədə mis-molibden filizlərinin qeyri-qanuni istismarının aparıldığı müşahidə olunub: “Həmin ərazilərin ekoloji tarazılığının pozulması, ətraf mühitə dəyən zərərin, həmçinin yataqların istismarı zamanı onlara dəymiş ziyanın müəyyənləşdirilməsi üçün monitorinq keçirilməsi tələb olunur. Monitorinq nəticəsində həm yataqlara, həm də ətraf mühitə, çaylara, meşə, torpaq, bitki örtüklərinə dəymiş zərərlərin müəyyənləşdirilməsi nəzərdə tutulub”.

Ş.Ataşov bildirib ki, yataqların istismarı kosmik görüntülərə əsasən aparılan monitorinqlər nəticəsində müəyyənləşdirilib: “Dəmirli” mis-molibden yatağı ərazisində son dövrə qədər də istismar işlərinin aparıldığı kosmik görüntülərdən müşahidə olunub. Ərazilərdə aparılan istismar işlərinin nəzarətsiz olması hesablanmış ehtiyatların gələcək nəsillərə çatmamasına, ətraf mühitə dəymiş zərərin böyük fəsadlar törədəcəyinə gətirib çıxaracaq”