Avqustun 24-də Yaponiya tarixində ən uzun müddətdə Baş Nazir vəzifəsində qalması ilə rekord müəyyənləşdirən Şinzo Abe göstərilən inama və dəstəyə görə xalqa minnətdarlığını ifadə edib.
×
Avqustun 24-də Yaponiya tarixində ən uzun müddətdə Baş Nazir vəzifəsində qalması ilə rekord müəyyənləşdirən Şinzo Abe göstərilən inama və dəstəyə görə xalqa minnətdarlığını ifadə edib.
AZƏRTAC xəbər verir ki, bu barədə Baş Nazir avqustun 24-də jurnalistlər qarşısında çıxışında bildirib.
“Mən bu günə hər seçkidə xalqın göstərdiyi dəstək nəticəsində gəlmişəm və buna görə ürəkdən minnətdarlığımı bildirmək istəyirəm. Həmçinin ən çətin anlarda məni dəstəklədiklərinə görə onlara “Sağ ol!” deyirəm”, - deyə Ş.Abe vurğulayıb.
Baş Nazir, həmçinin qeyd edib ki, o, hər gün özünü bütünlüklə işinə həsr edərək xalqa verdiyi vədləri həyata keçirməyə və öz siyasətinin nəticələrini nümayiş etdirməyə çalışıb.
Hökumət başçısı səhhəti ilə əlaqədar bir həftə əvvəl keçdiyi müayinənin nəticələrini dəqiqləşdirmək üçün əlavə yoxlamadan keçdiyini də bildirib.
“Səhhətimin optimal vəziyyətdə olduğunu təsdiq etdikdən sonra yenidən vəzifələrimin icrasına qayıtmaq istəyirəm”, - deyə Baş Nazir bildirib.
Xatırladaq ki, avqustun 24-də Şinzo Abe Yaponiya tarixində fasiləsiz olaraq hökumət başçısı vəzifəsində qalması ilə yeni rekord müəyyən edib. 2012-ci ilin dekabrında keçirilən seçkilərdə qələbədən sonra o, 2799 gündür ki, Yaponiya hökumətinə başçılıq edir. Ş.Abe 2019-cu ilin noyabrında Yaponiyada Baş Nazir vəzifəsində ümumilikdə ən uzun müddət qalmış siyasətçi kimi də ölkə tarixinə düşüb.
Baş Nazirin qarşıda duran vəzifələri icra etməsi üçün hər gün əzmlə çalışdığını bildirən Yaponiya Nazirlər Kabinetinin baş katibi Yoşihide Suqa geridə qalan yeddi il səkkiz ayın sanki bir gün kimi ötüb keçdiyini deyib.
Vüqar Ağayev
AZƏRTAC-ın xüsusi müxbiri
Tokio