Yeni Azərbaycan Partiyasının (YAP) yaranmasının 33-cü ildönümü münasibətilə noyabrın 19-da YAP Səbail rayon təşkilatı tərəfindən tədbir təşkil edilib.

AZƏRTAC xəbər verir ki, tədbir iştirakçıları əvvəlcə Ulu Öndər Heydər Əliyevin və Vətən uğrunda mübarizədə canlarından keçmiş şəhidlərin əziz xatirəsini bir dəqiqəlik sükutla yad ediblər.

Sonra partiyanın fəaliyyəti ilə bağlı videoçarx nümayiş olunub.

YAP Səbail rayon təşkilatının sədri Muxtar Nağıyev çıxışında bildirib ki, partiya bu il 33 illik fəaliyyətini qeyd edir. O vurğulayıb ki, YAP üzvləri bu müddət ərzində Azərbaycan xalqına xidmət, şərəf və fədakarlıq nümunəsi göstəriblər.

M. Nağıyev Azərbaycanın çətinlikləri geridə qoyaraq bugünkü nailiyyətlərə çatmasında Yeni Azərbaycan Partiyasının mühüm rol oynadığını xüsusi vurğulayaraq deyib: “Bu gün əldə olunan uğurlar həm partiyanın, həm də xalqın birliyinin və fədakarlığının nəticəsidir”.

Azərbaycan Dövlət İqtisad Universitetinin (UNEC) rektoru, professor Ədalət Muradov çıxışında YAP-ın yaranmasının 33-cü ildönümünü qeyd etməyin böyük şərəf olduğunu söyləyib.

O qeyd edib ki, YAP yalnız siyasi təşkilat deyil, müstəqil Azərbaycanın dövlətçilik fəlsəfəsinin, siyasi sabitliyinin və strateji inkişaf xəttinin formalaşmasında mühüm rol oynayan bir qüvvədir.

Ailə, Qadın və Uşaq Problemləri üzrə Dövlət Komitəsi sədrinin müavini Sədaqət Qəhrəmanova partiyanın dünənin, bu günün və gələcəyin siyasi xəttini müəyyənləşdirdiyini vurğulayıb. O, partiya üzvlərinin zəhmət və fədakarlığının YAP-ın uğurlarının əsasını təşkil etdiyini diqqətə çatdırıb.

Səbail Rayon İcra Hakimiyyəti başçısının müavini Eldar Ağayev çıxışında YAP-ın yaranmasının yalnız bir siyasi təşkilatın formalaşması deyil, həm də Azərbaycanın tarixinə yön verən mühüm hadisə olduğunu söyləyib.

Vətən müharibəsi şəhidi Murad Qurbanovun anası Mehriban Qurbanova şəhid anaları adından çıxış edərək, övladlarının qəhrəmanlığını xatırladıb. O, dövlət tərəfindən şəhid ailələrinə göstərilən diqqət və qayğıya görə minnətdarlığını bildirib.

Qarabağ müharibəsi iştirakçısı Ramin Şirinov qazilər adından çıxış edərək, döyüş xatirələrini bölüşüb və qazilərin, eləcə də şəhid ailələrinin xidmətlərinin dövlət və xalq tərəfindən yüksək qiymətləndirildiyini vurğulayıb.

Natiqlər Azərbaycanın müstəqilliyinin, ərazi bütövlüyünün və vətənpərvərlik dəyərlərinin qorunmasının əhəmiyyətini bir daha diqqətə çatdırıblar.

Tədbir bədii hissə ilə davam edib.