Fevralın 23-də Xarici İşlər Nazirliyində Xocalı soyqırımının 31-ci ildönümünə həsr olunmuş könüllülər arasında esse müsabiqəsinin təltifetmə tədbiri keçirilib.
×
Fevralın 23-də Xarici İşlər Nazirliyində Xocalı soyqırımının 31-ci ildönümünə həsr olunmuş könüllülər arasında esse müsabiqəsinin təltifetmə tədbiri keçirilib.
AZƏRTAC xəbər verir ki, tədbirdə çıxış edən xarici işlər nazirinin müavini Xələf Xələfov Xocalı soyqırımı haqqında könüllüləri məlumatlandırıb: "XXI əsrin ən böyük cinayətlərindən olan Xocalı soyqırımının 31-ci ildönümü ərəfəsindəyik. Azərbaycan dövləti Xocalı faciəsinin beynəlxalq aləmdə soyqırımı cinayəti kimi tanınması üçün çalışır.
Nazir müavini qeyd edib: “Biz indiyədək Xocalı soyqırımını törədənləri məsuliyyətə cəlb edə bilməmişik. Bu cinayəti keçmiş SSRİ-nin 366-cı motoatıcı alayı ilə birlikdə erməni terrorçuları törədiblər. Serj Sarkisyan öz etiraflarında deyib ki, biz Azərbaycan xalqına qarşı etnik təmizləmə siyasətini həyata keçirmək üçün bu cinayəti törətmişik”.
Xələf Xələfov qeyd edib ki, biz Xocalı soyqırımını törədənlərin Beynəlxalq Ədalət Məhkəməsinə verilməsi üçün çalışırıq.
Xocalı soyqırımının Ermənistanın tarixində qara ləkə olduğunu söyləyən nazir müavini deyib: "Biz regionda sülhün bərqərar olunması üçün bütün addımları atırıq. Azərbaycanın sülh siyasəti qalib gələcək".
Sonra çıxış edən Xarici İşlər Nazirliyinin Mətbuat xidməti idarəsinin rəisi Ayxan Hacızadə deyib ki, esse müsabiqəsinin əsas məqsədi Xocalı faciəsi barədə məlumatlılığın artırılmasıdır. Həmçinin faciənin dünya ictimaiyyətinə çatdırılması da müsabiqənin əsas məqsədlərindəndir. Bu müsabiqəyə 23 könüllü təşkilatından 50-dən çox könüllü qatılıb.
Ayxan Hacızadə qeyd edib ki, müsabiqənin nəticəsinə uyğun olaraq 3 nəfər mükafatlandırılıb.