Bakıda keçirilən BMT-nin Ümumdünya Şəhərsalma Forumunun 13-cü sessiyası (WUF13) çərçivəsində Şəhər Düşüncələri Kampusu (ŞDK) təşəbbüsünün qlobal və yerli səviyyələr arasında əməkdaşlığı gücləndirən fəaliyyət platforması kimi əhəmiyyəti müzakirə olunub.

AZƏRTAC xəbər verir ki, tədbirdə şəhərlərin iqlim riskləri, sosial bərabərsizlik, infrastruktur çatışmazlığı və urbanizasiya ilə bağlı artan çağırışlarla üzləşdiyi bir dövrdə qlobal dialoqun yerli fəaliyyətlə əlaqələndirilməsinin vacibliyi vurğulanıb.

Bildirilib ki, Şəhər Düşüncələri Kampusu çoxtərəfli maraqlı tərəfləri bir araya gətirən, birgə həllərin hazırlanmasına imkan yaradan və yerli səsləri qlobal siyasət proseslərinə inteqrasiya edən desentralizasiya olunmuş platforma kimi fəaliyyət göstərir.

Qeyd olunub ki, WUF13 Şəhər Düşüncələri Kampusu təşəbbüsünün şəhərsalma sahəsində fəaliyyətlərin sürətləndirilməsi və çoxtərəfli tərəfdaşlıqların gücləndirilməsi üçün əsas icra mexanizmi kimi yenidən mövqeləndirilməsi baxımından strateji əhəmiyyət daşıyır.

Sessiyanın əsas məqsədinin Şəhər Düşüncələri Kampusunu urban prioritetlərin həyata keçirilməsini dəstəkləyən qlobaldan yerliyə fəaliyyət platforması kimi rəsmi şəkildə təqdim etmək və onun ətrafında beynəlxalq tərəfdaşları səfərbər etmək olduğu diqqətə çatdırılıb.

Tədbirdə vurğulanıb ki, şəhərlər yalnız risklərin cəmləşdiyi məkanlar deyil, eyni zamanda innovativ həllərin və dayanıqlı inkişaf imkanlarının əsas mənbəyidir. Şəhər Düşüncələri Kampusu platformasının isə dialoqu konkret və yerli ehtiyaclara əsaslanan fəaliyyətə çevirdiyi bildirilib.

Müzakirələr zamanı Dayanıqlı İnkişaf Məqsədləri, iqlim gündəliyi və mənzil siyasəti kimi qlobal prioritetlərlə yerli təşəbbüslərin əlaqələndirilməsinin vacibliyi qeyd olunub. Həmçinin çoxtərəfli koalisiyaların və tərəfdaşlıqların təsirin genişləndirilməsi baxımından mühüm rol oynadığı vurğulanıb.

İnteraktiv formatda təşkil olunan sessiya açılış nitqləri, ŞDK-nın gələcək baxışı və fəaliyyət yol xəritəsinin təqdimatı, tərəfdaş qurumların çıxışları və müxtəlif ölkələrdə ŞDK-ların təşkili üçün müraciət çağırışı ilə davam edib.

Tədbir çərçivəsində ŞDK təşəbbüsünün beynəlxalq səviyyədə daha geniş tanınmasının, yeni tərəfdaşlıqların formalaşdırılmasının və müxtəlif ölkələrdə ŞDK tədbirlərinin təşkilinə dair öhdəliklərin təşviq edilməsinin əsas gözlənilən nəticələrdən olduğu bildirilib.

Qeyd edilib ki, bu təşəbbüs WUF13-ün irsinin konkret fəaliyyət mexanizmləri ilə davam etdirilməsinə, forumdan kənarda iştirakçılığın genişləndirilməsinə və şəhərsalma sahəsində qlobal əməkdaşlığın möhkəmləndirilməsinə töhfə verir.