Dövlətin sosial, iqtisadi və ekoloji hədəflərinin reallaşdırılmasında mühüm təşəbbüs olan DİM beynəlxalq Ali Audit Qurumları icmasında ciddi şəkildə dəstəklənir. Bu baxımdan INTOSAI (Ali Audit Qurumlarının Beynəlxalq Təşkilatı) özünün strateji sənədlərində Dayanıqlı İnkişaf Məqsədlərinə nail olunmasını uzunmüddətli dövr üçün əsas hədəflərdən biri kimi müəyyən edib.

AZƏRTAC xəbər verir ki, bu barədə Hesablama Palatasının sədri Vüqar Gülməmmədov oktyabrın 24-də Bakıda keçirilən “2023-cü il Qlobal Dayanıqlı İnkişaf Məqsədləri (DİM) Sammitinin Nəticələri və DİM-lərin həyata keçirilməsində Ali Audit Qurumlarının rolu” mövzuzunda 3-cü DİM Dialoqunda deyib.

O bildirib ki, hazırlanan beynəlxalq prinsip, standart və təlimatlarda da bu qlobal çağırış nəzərə alınıb. INTOSAI-ın IDI (INTOSAI İnkişaf Təşəbbüsü) təşkilatı tərəfindən hazırlanan “Strateji İdarəetmə Təlimatı”nda da DİM-lərin, xüsusilə 5-nin (Yoxsulluğa son, Aclığa son, Yaxşı səhiyyə və rifah, Keyfiyyətli təhsil, Gender bərabərliyi) diqqətdə saxlanılmasının vacib olduğu vurğulanıb. Bu istiqamətdə “Dayanıqlı İnkişaf: Ali Audit Qurumlarının rolu” adlı ISSAI 5130 standartı qəbul edilib və 2019-cu ildən bu sənəd təlimata çevrilib. Təlimat hazırda ətraf mühit və dayanıqlı inkişaf auditləri keçirən AAQ-lar üçün əsas istinad sənədi hesab edilir.