Sentyabrın 10-da Xətai rayonundakı Heydər Əliyev adına istirahət parkının amfiteatr səhnəsində "Uğura gedən yol əngəl tanımır" mövzusunda Bilik Günü tədbiri keçirilib. Tədbirin məqsədi fərqli inkişaf xüsusiyyətlərinə malik olan uşaqların cəmiyyətə inteqrasiyasını dəstəkləmək, onların istedadlarını nümayiş etdirmək və ictimaiyyətin diqqətini inklüziv yanaşmaya yönəltmək idi.

AZƏRTAC xəbər verir ki, Xətai Rayon İcra Hakimiyyəti, Bakı Şəhər Mədəniyyət Baş İdarəsi, Sosial Xidmətlər Agentliyi, "Koxlear İmplantlı Şəxslərə Sosial Yardım" İctimai Birliyinin birgə təşkilatçılığı ilə keçirilən tədbir koxlear implantlı uşaqların ifasında Dövlət Himninin səsləndirilməsi ilə başlayıb. Daha sonra ərazi bütövlüyümüz, suverenliyimiz naminə canlarından keçən qəhrəmanların əziz xatirəsi bir dəqiqəlik sükutla yad edilib.

Tədbirdə çıxış edənlər bu gün amfiteatrda fərqli formatda, insan qəlbindəki mərhəmət hisslərini oyadan tədbir keçirildiyini diqqətə çatdırıblar. Qeyd olunub ki, əsl qüsur sağlamlıq imkanlarının məhdud olması deyil, o, insanın zehnində, həyata baxışlarında, düşüncələrində formalaşır və həmin şəxslər cəmiyyət üçün təhlükəli, zərərli olurlar. Bildirilib ki, bugünkü tədbirin həsr olunduğu fərqli inkişaf xüsusiyyətlərinə malik uşaqlar isə öz istedadları ilə parlaq gələcəklərini müəyyənləşdiriblər. Dövlətimizin həmin uşaqlarla bağlı kifayət qədər tədbirlər həyata keçirdiyi, onlara xüsusi diqqət və qayğı göstərildiyi vurğulanıb. Nəticədə onların həyata baxışında pozitiv meyillər yaranıb və istedadlarını göstərməkdən çəkinmirlər. Qeyd olunub ki, hər bir vətəndaşın, hər bir qurumun ümdə vəzifəsi bu cür uşaqların öz bacarıqları ilə cəmiyyətimizi rəngləndirməsinə dəstək göstərməkdir. Bugünkü tədbirin də məhz həmin amala xidmət etdiyi diqqətə çatdırılıb. Natiqlərin sözlərinə görə, görülən işlər öz bəhrəsini verir. Belə ki, cəmiyyətimizin fərqli fərdləri olan həmin uşaqların inklüziv həyata qoşulması onların müalicəsində də müsbət nəticələrə səbəb olur. Çıxış edənlər uğura gedən yolun əngəl tanımadığını, səbir, iradə və əzm tələb etdiyini deyiblər.

Çıxışlardan sonra keçirilən bədii hissədə fərqli inkişaf xüsusiyyətlərinə malik olan uşaqlar öz istedadlarını nümayiş etdiriblər.

Sonda tədbirin təşkilində iştirak edən şirkət və qurumlar, o cümlədən günün qəhrəmanları olan uşaqlar təltif olunublar.

Tədbir çərçivəsində, həmçinin fərqli inkişaf xüsusiyyətlərinə malik olan uşaqların əl işlərindən ibarət sərgi də nümayiş etdirilib.