Türkiyədə COVID-19-la bağlı qadağaların yenidən qüvvəyə mindiyi vilayətlərin sayı artmaqda davam edir. Toy, nişan, ad günü kimi şənliklərin qadağan olunduğu şəhərlərin sayı isə 16-ya çatıb.

AZƏRTAC xəbər verir ki, ölkənin bəzi vilayətlərində mərasimlərin qapalı məkanlarda, bəzilərində isə ümumiyyətlə keçirilməsi qadağan olunub. Açıq havada keçiriləcək mərasimlərdə tətbiq olunan qadağalara qonaqların məkanın üçdəbirini doldurması, rəqs edilməməsi, yaxın təmasda olmaması da daxildir. Qadağalar çərçivəsində bəy və gəlinin birinci dərəcəli qohumları istisna olmaqla, yaşı 65-dən yuxarı olanların iştirak etməsinə icazə verilməyəcək, digər qonaqların sosial məsafə qaydaları çərçivəsində hərəkət etməsi nəzərdə tutulur.

Bütün ölkəni əhatə edən qadağalara isə yaşı 65-dən yuxarı və xroniki xəstəlikləri olan şəxslərin ehtiyac duyulmadığı təqdirdə evdən çıxmaması, ümumiyyətlə əhalinin evdən kənarda maskasız hərəkət etməməsi daxildir.

Xatırladaq ki, avqustun 31-də Türkiyənin orta məktəblərində yeni tədris ili distant qaydada başlayıb. COVID-19-la bağlı vəziyyətdən asılı olaraq ənənəvi təhsilin sentyabrın 21-dən başlanması nəzərdə tutulur.

Qeyd edək ki, COVID-19-a yoluxma faktının qeydə alındığı ilk gündən indiyədək Türkiyədə 7 milyon 247 min 935 nəfər koronavirus testindən keçirilib. Hazırda ölkədə 271 min 705 aktiv xəstə var ki, onlardan da 991-nin vəziyyəti ağırdır. İndiyədək Türkiyədə 6 min 417 nəfər yeni növ koronavirus infeksiyasından vəfat edib.