Türkiyənin daxili və xarici siyasətinin mərkəzində müstəqil və suveren inkişaf yolu dəyişməyib. Xüsusilə son 20 ildə türk xalqının milli dəyərlər əsasında dünyada mövqeyi güclənib, daha geniş coğrafiyalarda məhz mədəniyyət, din və millət idealları əsasında əməkdaşlıq formatları genişlənib.

AZƏRTAC xəbər verir ki, bu fikirləri Sosial Tədqiqatlar Mərkəzinin İdarə Heyətinin və Milli Məclisin İnsan hüquqları komitəsinin sədri Zahid Oruc "Türkiyədə prezident seçkiləri - 2023 Azərbaycan ictimai rəyində" mövzusunda keçirilən tədbirdə söyləyib.

Zahid Oruc deyib: "Birinci Dünya müharibəsindən sonra - 1923-cü ildə Osmanlı mirası üzərində qurulan Türkiyə Cümhuriyyəti 100 il sonra dünya siyasətində aparıcı ölkələr sırasında yer alır".