“Türkiyə və Azərbaycan İş Adamları və Sənayeçiləri İctimai Birliyi”nin (TÜİB) 6-cı seçkili ümumi yığıncağı keçirilib.

AZƏRTAC xəbər verir ki, tədbir Azərbaycan və Türkiyə himnlərinin səsləndirilməsi ilə başlanıb.

Ümummilli Lider Heydər Əliyev, Türkiyə Cümhuriyyətinin qurucusu Ulu Öndər Mustafa Kemal Atatürk və hər iki qardaş ölkənin bütün şəhidlərinin əziz xatirəsi bir dəqiqəlik sükutla yad edilib. Tədbirdə TÜİB-in ötən dövr ərzindəki fəaliyyətinə dair təqdimat nümayiş olunub. Təqdimatda birliyin gördüyü işlər, həyata keçirilən layihələr və gələcək hədəflər barədə ətraflı məlumat verilib.

Açılış nitqləri ilə çıxış edən TÜİB İdarə Heyətinin sədri Hüseyin Büyükfırat iki qardaş ölkə arasındakı iqtisadi əməkdaşlığın gücləndirilməsində birliyin rolunu vurğulayıb və yeni dönəmdə daha böyük məqsədlərlə yola davam ediləcəyini bildirib. O, həmçinin TÜİB-in yalnız iqtisadi və ticarət sahəsində deyil, sosial-mədəni sahədə həyata keçirdiyi layihələrlə də iki ölkə arasındakı qardaşlıq münasibətlərinin inkişafında mühüm rol oynayacağını vurğulayıb.

Tədbirdə Türkiyənin Azərbaycandakı səfiri Birol Akgün, iqtisadiyyat nazirinin birinci müavini Elnur Əliyev, Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov və Türkiyə Ticarət nazirinin müavini Mahmut Gürcan, İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı, AZPROMO-nun icraçı direktoru Yusif Abdullayev çıxış edərək TÜİB-in fəaliyyətini yüksək qiymətləndiriblər. Onlar iki ölkə arasında iqtisadi əlaqələrin inkişafında bu kimi birliklərin əhəmiyyətini vurğulayıblar.

Rəsmi çıxışlardan sonra 6-cı ümumi yığıncağın seçkilərinə start verilib və TÜİB-in yeni İdarə Heyətinin seçilməsi prosesi həyata keçirilib. Səsvermə nəticəsində Hüseyin Büyükfırat yenidən sədr seçilib. Həmçinin Savaş Uzan, Şahin Məmmədov, Selçuk Demir, Necmeddin Taşbağ, Selim Akbay, Lokman Biter, Rəna Məmmədova, Azər Mirzəyev, Günay Ağayeva, Salih Tüfekçi, Kerem Demir, Ahmet Köse, Yılmaz Nalkıran, Oktay Vayiç səsvermə nəticəsində İdarə Heyətinin üzvləri seçiliblər.