Dekabrın 19-da Azərbaycan Tibb Universitetində Azərbaycan Könüllü Həkimlər Assosiasiyası tərəfindən “Könüllülük hərəkatının səhiyyə sektorunda rolu: mövcud reallıq və perspektivlər” mövzusunda beynəlxalq konfrans keçirilib.

AZƏRTAC xəbər verir ki, konfrans Ulu Öndər Heydər Əliyevin 100 illiyinə həsr olunub.

Əvvəlcə konfransda Azərbaycan Respublikasının Dövlət Himni səsləndirilib.

Konfransın keçirilməsində əsas məqsəd qlobal səhiyyə sistemində rast gəlinən çətinliklərin aradan qaldırılmasında könüllülük hərəkatının daha aktiv iştirakını, münaqişə və fövqəladə hallar zamanı tibb xidmətinin ən yüksək səviyyədə təşkili üçün doğru və innovativ yanaşmanın tətbiq olunmasını təmin etmək, postmüharibə dövründə həssas təbəqə üzvlərinin tibb xidmətlərinə əlçatanlığına nail olmaq, eləcə də həkimlərin könüllü əsasda aksiyalar və tibbi təşəbbüslərlə çıxış etməsinə təkan verməkdir. Bu xüsusda ayrı-ayrı dövlətlərin könüllü həkimlər təşkilatları ilə qarşılıqlı təcrübə mübadiləsi aparmaq, müharibə və fövqəladə hallarda birgə işləyərək planetimizin sağlam gələcəyinə dəyərli töhfələr vermək əsas amaldır.

Azərbaycan Könüllü Həkimlər Assosiasiyasının (AKHA) rəhbəri, ATU-nun Ağız, üz-çənə cərrahiyyəsi kafedrasının assistenti Oqtay Mehdiyev çıxış edərək bildirib ki, həmvətənlilərimizlə bərabər könüllü kimi müxtəlif sahələrə töhfə verməyimiz heç də təsadüfi sayılmamalıdır. Bu missiya tarixən xalqımızın sıx bağlı olduğu milli-mənəvi dəyərlərlə üst-üstə düşür. Sirr deyil ki, Azərbaycanda könüllülük fəaliyyətinə 2012-ci ildə “ASAN xidmət”də start verildi. Daha sonrakı illərdə Müzəffər Ali Baş komandan, Prezident İlham Əliyevin birbaşa tapşırığı ilə əksər dövlət qurumlarını əhatə etməyə başladı. Xüsusilə də ölkəmizdə keçirilən qlobal səviyyəli beynəlxalq tədbirlərdə könüllülük fəaliyyəti təşkilatçılıqda effektiv təsirini göstərdi, özünü tam doğrultdu: “Biz həkimlərin könüllülük hərəkatına qoşulması isə zamanın tələbindən irəli gələn zəruri sosial sifariş idi. Belə ki, ilk olaraq dünyanı ağuşuna alan pandemiya - koronovirusla mübarizədə yüzlərlə azərbaycanlı həkim, sözün əsl mənasında, ağxalatlı qəhrəmanlara çevrildi, xalqımızın və dövlətimizin apardığı həyati mübarizədə pay sahibi oldu. Bir sözlə, Azərbaycan Könüllü Həkimlər Assosiasiyası bu gün qürur duyduğumuz Zəfər tariximizin tibb sektorunda təcəssümüdür”.

AKHA-nın rəhbəri qeyd edib ki, könüllü həkimlərimizin fəaliyyəti tələbə və gənc həkimlərimizə də ilham mənbəyi oldu: “Onlara Vətən sevgisi, vətənpərvərlik duyğularını aşılamaq və təcrübi biliklərini artırmaq üçün AKHA-nın tələbə təşkilatını yaratdıq. Tələbə təşkilatının yaradılması isə tibb universitetinin 4-cü, 5-ci kurs tələbələri və rezidentura pilləsində təhsil alan tələbələrin aksiyalarımıza cəlb olunaraq praktikalarının artırmasına və yüksək ixtisaslı həkimlərlə uzunmüddətli təmasda olmasına şərait yaradır”, - deyə O.Mehdiyev əlavə edib.

Sonra çıxış edən türkiyəli həkim bildirib ki, Azərbaycanda tibb sahəsi yüksək səviyyədə inkişaf edir və Türkiyəyə də bu sahəyə öz töhfəsini verməyi qürurvericidir.

“Azərbaycan bizim üçün hər zaman “Bir millət, iki dövlət” prinsipi ilə “can Azərbaycan” deyə xitab etdiyimiz dost-qardaşımızdır. Hər çətinliyə düşdüyümüz zaman Azərbaycan dərhal öz köməyi ilə dostluğunu, qardaşlığını göstərib. Çətin günün dostu olan Azərbaycana təşəkkür edirəm. Belə layihələrin ərsəyə gəlməsində iştirak edən hər kəsə minnətdarlığımı ifadə edir, səmimi arzularımı çatdırıram. Türkiyədə də belə layihələr təşkil edilir və bu layihələr ölkənin səhiyyə sektoruna öz müsbət təsirini göstərir”, - deyə türkiyəli həkim əlavə edib.

Beynəlxalq konfrans çıxışlarla və müzakirələrlə davam edib.