Bu ilin 9 ayı ərzində internet bankçılığı vasitəsilə aparılan əməliyyatların həcmi ötən ilin müvafiq dövrü ilə müqayisədə 15 faiz artaraq 172 milyard manat, mobil bankçılıq vasitəsilə həyata keçirilən əməliyyatların həcmi isə 2.4 dəfə artaraq 18.5 milyard manat olub.

AZƏRTAC xəbər verir ki, bunu oktyabrın 26-da Bakı Konqres Mərkəzində keçirilən “Critical Infrastructure Defence Challenge 2023”in (CIDC-2023) açılışında Azərbaycan Respublikası Mərkəzi Bankının sədri Taleh Kazımov deyib.

T.Kazımov qeyd edib ki, “Qapalı” bankçılıqdan “açıq” bankçılığa və daha sonra isə “açıq maliyyə” konsepsiyasına keçidin reallaşdırılması bankın əsas hədəflərindəndir. Bu da maliyyə institutlarında informasiya təhlükəsizliyi və kibertəhlükəsizlik üzrə tədbirlərin gücləndirilməsini zəruri edir. Maliyyə bazarlarında kiberdayanıqlığın və informasiya təhlükəsizliyinin gücləndirilməsi risklərə qarşı adekvat nəzarət mexanizmlərinin tətbiqi və risk əsaslı tənzimləmə çərçivəsinin formalaşdırılması kimi məsələlər Mərkəzi Bankın daim diqqət mərkəzindədir. Bu məqamda beynəlxalq standartlara (ISO27001) əsaslanan və ölkə banklarında informasiya təhlükəsizliyinə dair minimum tələbləri özündə cəmləyən Qaydaların yalnız banklara münasibətdə deyil, digər nəzarət subyektlərini də əhatə etməsi üzərində çalışırıq. Eyni zamanda, informasiya və kibertəhlükəsizlik üzrə artan çağırışlar fonunda Mərkəzi Bank müvafiq sahə üzrə strateji baxışını formalaşdırmışdır. Belə ki, Dünya Bankı Qrupunun üzvü olan Beynəlxalq Maliyyə Korporasiyası (IFC) ilə birgə əməkdaşlıq çərçivəsində 2023-2026-cı illəri əhatə edən “Maliyyə bazarlarında kibertəhlükəsizlik Strategiyası” hazırlanaraq qəbul olunub.

"Ölkəmiz sürətli inkişaf templəri ilə irəliləyir. Biz müasir informasiya kommunikasiya texnologiyaları sahəsində regionun lider dövlətlərindən birinə çevrilməkdəyik. İnnovativ həllər və yeni nəsil texnologiyalar artıq gündəlik həyatımızın ayrılmaz bir hissəsidir. Rəqəmsal texnologiyalardan asılılığımızın artması kibertəhlükələrə qarşı preventiv tədbirlərin görülməsinin önəmini artırır. Xüsusilə də strateji əhəmiyyətli coğrafi mövqeyimiz və siyasi arenadakı nüfuzumuz kibertəhlükəsizlik məsələsini milli təhlükəsizliyin bir elementi edir. Rəqəmsal transformasiya ölkəmizin maliyyə bazarlarından da yan keçməyib. Ənənəvi bankçılıqda fiziki xidmətlərin göstərilməsi zamanı informasiya və fiziki təhlükəsizliyinin qorunmasına xüsusi önəm verilirdi. Məsafədən maliyyə xidmətlərinin genişlənməsi isə həm də kibertəhlüksəzlik məsələsinin əhəmiyyətini artırdı. Artıq fiziki filial vasitəsilə bankçılıq rəqəmsal bankçılıq ilə əvəz olunur. Günlər ərzində aparılan hesablaşmalar isə real rejimdə həyata keçirilir", - deyə T.Kazımov əlavə edib.