“Rusiya İxrac Mərkəzi” ASC qeyri-resurs ixracını dəstəkləyən və Rusiya ixracatçılarını geniş spektrli maliyyə və qeyri-maliyyə dəstək tədbirləri ilə təmin edən şirkətlər qrupunu birləşdirən dövlət qurumudur.
×
“Rusiya İxrac Mərkəzi” ASC qeyri-resurs ixracını dəstəkləyən və Rusiya ixracatçılarını geniş spektrli maliyyə və qeyri-maliyyə dəstək tədbirləri ilə təmin edən şirkətlər qrupunu birləşdirən dövlət qurumudur. Bu il milli kollektiv sərgidə neft-qaz sənayesində fəaliyyət göstərən Rusiyanın 20 ixrac şirkəti iştirak edir və onların demək olar ki, yarısı sərginin debütantıdır.
Bu sözləri AZƏRTAC-a “Rusiya İxrac Mərkəzi”nin konqres və sərgi tədbirlərinin, eləcə də biznes məsələlərinin idarə olunması üzrə baş eksperti Svetlana Fidarova deyib.
Baş ekspert qeyd edib ki, əvvəlcədən B2B formatında yüzdən çox görüşün keçirilməsi nəzərdə tutulub və neft-qaz sərgisinin ilk günündə iyirmidən çox işgüzar danışıqlar aparılıb: “SOCAR və onun törəmə şirkətləri ilə əməkdaşlıq imkanları böyük maraq doğurur. Biz böyük müqavilələr bağlayacağımıza və ixrac potensialımızı artıracağımıza ümid edirik. Rusiya şirkətləri Azərbaycan tərəfinə yüksəkkeyfiyyətli neft-mədən xidmətləri, logistika sahəsində layihələr, eləcə də keyfiyyətinə görə Qərbdəki analoqlarından geri qalmayan, lakin qiymət baxımından daha cəlbedici məhsullar təklif edə bilər”.
Müsahibimiz onu da əlavə edib ki, Azərbaycanın işğaldan azad olunmuş ərazilərinin bərpasında Rusiya şirkətləri də maraqlıdır.