Cari ildə Sosial Xidmətlər Agentliyi tərəfindən 20 minə yaxın şəxsə xidmətlər göstərilib.

AZƏRTAC xəbər verir ki, bunu Əmək və Əhalinin Sosial Müdafiəsi Nazirliyi tabeliyində Sosial Xidmətlər Agentliyinin İdarə Heyətinin sədri Vüqar Behbudov 2022-ci ilin yekunlarına həsr olunan mətbuat konfransında deyib.

V.Behbudov şəhid ailələri və müharibə əlillərinin mənzillə təminatı məsələsinə toxunaraq deyib: “Postmüharibə dövründə 4300-dən çox şəxs mənzil və fərdi evlə təmin olunub. Ötən dövr ərzində həmin qəbildən olan vətəndaşlara 13 min 100 mənzil və fərdi ev təqdim edilib. Müharibə əlillərinin sosial təminatı proqramı çərçivəsində digər vacib istiqamət onların avtomobillə təminatıdır. Bu il 160, postmüharibə dövründə 324 avtomobil, ümumilikdə isə ötən dövr ərzində 7500 avtomobil həmin kateqoriyadan olan vətəndaşlara təqdim edilib”.