Azərbaycan Respublikası Dövlət Neft Fondunun (ARDNF) icraçı direktoru İsrafil Məmmədov və Suveren Fondların Beynəlxalq Forumunun (SFBF) icraçı direktoru Duncan Bonfieldin iştirakı ilə media brifinq keçirilib.
×
Azərbaycan Respublikası Dövlət Neft Fondunun (ARDNF) icraçı direktoru İsrafil Məmmədov və Suveren Fondların Beynəlxalq Forumunun (SFBF) icraçı direktoru Duncan Bonfieldin iştirakı ilə media brifinq keçirilib.
AZƏRTAC xəbər verir ki, İsrafil Məmmədov SFBF–nin təsis olunmasında ARDNF-nin ilkin təşəbbüskarlar kimi çıxış etdiyini və Forumun ilk üzvlərindən biri olduğunu vurğulayıb: “SFBF-nin əsasını təşkil edən prinsiplər əsas 4 istiqamət üzərində qurulub: Effektli idarəçilik, hesabatlılıq, şəffaflıq və sosial investisiya fəaliyyətinin təşkili. Bu il keçirilən tədbirdə ən əsas məsələlərə toxunulub. Dünya iqtisadiyyatında baş verən trendlər, geosiyasi gərginlik, makroiqtisadi təzyiqlər, inflyasiya və bir sıra başqa mövzular ətrafında fikir mübadiləsi aparılıb”.
Brifinqdə SFBF-nin icraçı direktoru Duncan Bonfield qeyd edib ki, Azərbaycanın xarici borc öhdəlikləri ilə bağlı vəziyyəti digər ölkələrdən çox yaxşıdır. Azərbaycanın borclanma siyasəti istiqamətində güclü mövqeyi var.
“Bu konfrans vasitəsilə investorlar yatırım etmək üçün ölkələr, burada baş verən hadisələr haqqında ətraflı məlumat alırlar. Son dövrlərdə texnologiya şirkətlərinin səhmləri aşağı düşsə də, hazırda bu sahəyə sərmayə qoyuluşu aktuallığını qoruyur”, - deyə SFBF-nin icraçı direktoru diqqətə çatdırıb