Yanvar-avqust aylarında 290 kilometrdən çox təbii qaz xətti təmir edilib.
“Azəriqaz” İstehsalat Birliyindən AZƏRTAC-a bildirilib ki, birlik cari ildə təbii qaz təsərrüfatı infrastrukturunun genişləndirilməsi işlərini uğurla davam etdirir.
×
Yanvar-avqust aylarında 290 kilometrdən çox təbii qaz xətti təmir edilib.
“Azəriqaz” İstehsalat Birliyindən AZƏRTAC-a bildirilib ki, birlik cari ildə təbii qaz təsərrüfatı infrastrukturunun genişləndirilməsi işlərini uğurla davam etdirir. Belə ki, tərtib edilmiş tədbirlər proqramına uyğun olaraq nəzərdə tutulmuş işlərin icrası ilə əlaqədar ilk növbədə kənd və qəsəbələrin daşıyıcı qaz kəmərlərinin yenidən qurulması, kəmərlər üzərində quraşdırılmış istismar müddəti bitmiş avadanlıqların yeniləri ilə əvəz edilməsi, sonrakı mərhələdə isə mövcud qazpaylayıcı şəbəkələrin, küçə və dalanların qaz xətlərinin yenidən qurulması, eləcə də hər bir istehlakçının mənzilinə qaz sayğaclarının quraşdırılması işləri aparılır.
Bu ilin yanvar-iyul aylarında 328,9 kilometr qaz kəməri əsaslı təmir edilib. Bakı Regional Qaz İstismar Departamenti, regional qaz istismar idarələri və Sumqayıt Qaz İstismar Sahəsi tərəfindən isə daxili imkanlar hesabına cari ilin yanvar-avqust ayları ərzində 290,89 kilometr uzunluğunda (o cümlədən 262,52 kilometr metal boru, 28,37 kilometr polietilen boru) müxtəlif diametrli qaz xətləri təmir edilərək yenisi ilə əvəz olunub, 366 qaz tənzimləyici və 318 bağlayıcı armaturlar (siyirtmə və rəzələr) quraşdırılıb. O cümlədən, dayaqlar üzərinə qaldırılması nəzərdə tutulan 258 min 361 metr borudan 96 min 302 metri (37,2 faiz) dayaqlar üzərinə qaldırılıb, rənglənməsi nəzərdə tutulan 337 min 228 metr borunun 103 min 315 metrlik hissəsi (30,6 faiz) rənglənib.
Regionlar üzrə 17 yeni salınmış yaşayış massivinə, 4 yaşayış məntəqəsinə (o cümlədən avqust ayında bir yaşayış massivi, 4 yaşayış məntəqəsi) təbii qazın verilməsi təmin edilib. Son illər respublika ərazisində kənd və qəsəbələrin, yeni yaşayış massivlərinin qazlaşdırılması, eləcə də yeni istehsal təyinatlı obyektlərin istismara verilməsi abonentlərin sayının və təbii qaza olan tələbatın artmasına səbəb olub. Belə ki, hazırda ümumi əhali abonent sayı 2 milyon 300 minə yaxınlaşmaqdadır.