1990-cı il yanvarın 20-si müasir tariximizin faciəli olmaqla bərabər, həm də qəhrəmanlıq səhifəsidir. Otuz dörd il əvvəl yanvarın 19-dan 20-nə keçən gecə SSRİ silahlı qüvvələrinin müxtəlif qoşun növlərindən formalaşdırılan hərbi birləşmələr paytaxt Bakıya yeridildi. Azərbaycanın ərazi bütövlüyünü hədəf seçən erməni separatçılığına və onlara dəstək verən qüvvələrə dinc şəkildə etiraz edən insanlara divan tutan cəza maşını azərbaycanlıların qəlbindəki azadlıq duyğuları öldürə bilmədi.

AZƏRTAC xəbər verir ki, 20 Yanvar faciəsinin 34-cü ildönümündə paytaxtın “20 Yanvar” dairəsində şəhidlərin xatirəsinə ucaldılan abidə kompleksini ziyarətə gələnlərin ardı-arası kəsilmirdi. Əllərində tər çiçəklər tutmuş insanların baxışlarında qürur, mübarizlik özünü büruzə verirdi.

Yasamal Rayon İcra Hakimiyyəti və qeyri-hökumət təşkilatları tərəfindən abidə önünə əklil və gül dəstələri qoyularaq, şəhidlərin xatirəsi ehtiramla anılıb.

20 Yanvar şəhidlərinin xatirəsinin bir dəqiqəlik sükutla anılmasından sonra ölkəmizin müstəqilliyi və suverenliyi uğrunda canlarını qurban verən insanların ruhuna bir daha hörmət və ehtiram ifadə olunub.

Ziyarətə gələnlər arasında şəhid Aslan Ağaverdiyev adına 31 nömrəli məktəbin müəllimi Sevinc Axundova AZƏRTAC-a müsahibəsində o vaxt “20 Yanvar” dairəsində baş verənləri yaxşı xatırladığını deyib: “Bu hadisələr bizim azadlığımıza gedən yolda mayak idi. İnsanların öz müstəqilliyini tələb etdiyi bir zamanda yaşından, cinsindən, milliyyətindən asılı olmayaraq hər kəsi qətlə yetirdilər. Şagirdlərimiz Larisa və İlqar da həmin gün düşmən gülləsini tuş gəldi. Bu gün biz Qələbə müjdəsi sayəsində böyük ürək rahatlığı ilə 20 Yanvar faciəsini anırıq".

Anım mərasimində iştirak edən müsahibimiz Süleyman Məmmədov dəhşətli anları xatırlayaraq vurğulayıb ki, Ümummilli Lider Heydər Əliyev həmin dövrdə olan bütün çətinliklərə baxmayaraq, 1990-cı il yanvarın 21-də siyasi iradə nümayiş etdirərək Azərbaycanın Moskvadakı daimi nümayəndəliyinə gedib və SSRİ rəhbərliyinin törətdiyi bu cinayətin humanizmə zidd olduğunu bəyan edib: "Bakıda törədilmiş cinayətlər haqqında həqiqətlərin ilk dəfə dünya ictimaiyyətinə çatdırılmasında Ulu Öndər Heydər Əliyevin bu qətiyyətli addımı mühüm əhəmiyyət kəsb edirdi”.

Faciənin canlı şahidi Fatma Abbasova o qanlı gecədə baş verənləri böyük ürəkağrısı ilə xatırladığını deyir: “İndi durduğumuz ərazi həmin gün al qana boyanmışdı. Bu gün artıq şəhidlərimizin ruhu şaddır. 2020-ci il Azərbaycan xalqı üçün Zəfər ili oldu. Otuz ilə yaxın düşmən tapdağı altında qalan dədə-baba torpaqlarımız Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusu tərəfindən işğaldan azad etdi. Şəhidlərimizin qanı yerdə qalmadı, onların qisası alındı. Bu xalqımıza qürur yaşatdı. Bu günləri bizə yaşatdığına görə Müzəffər Ali Baş Komandana, rəşadətli Ordumuza minnətdarıq”.

Bu hadisələrin hər il xatırlanması tam qətiyyətlə deməyə əsas verir ki, Vətən uğrunda canını fəda etmiş şəhidlərimizin xatirəsi Azərbaycan xalqının qəlbində əbədi yaşayacaq.