Fevralın 7-nə təyin edilmiş növbədənkənar Azərbaycan Respublikası Prezidenti seçkilərinin hazırlanıb keçirilməsi üzrə əsas hərəkət və tədbirlərin təsdiqlənmiş Təqvim Planına əsasən, 8 saylı Binəqədi birinci seçki dairəsi dairə və məntəqə seçki komissiyalarının bütün üzvlərinin iştirakı ilə onların hazırlığının artırılması, seçki sahəsində bilik, bacarıq və işgüzar vərdişlərinin təkmilləşdirilməsi, xüsusilə protokolların düzgün doldurulması məqsədilə yanvarın 22-də 8 saylı Binəqədi birinci seçki dairəsi dairə seçki komissiyasında növbəti treninq təşkil olunub.

AZƏRTAC xəbər verir ki, treninqdə çıxış edən 8 saylı Binəqədi birinci seçki dairəsi dairə seçki komissiyasının sədri Natiq Əliyev seçki dairəsi üzrə hazırda 37 seçki məntəqəsinin fəaliyyət göstərdiyini bildirib. Deyib ki, seçki qanunvericiliyinə əsasən, bir seçki məntəqəsinin səsverməyə azı 5 gün qalmış seçki dairəsinin ərazisində yerləşən 11 saylı Ciddi Rejimli Cəzaçəkmə Müəssisəsində yaradılması nəzərdə tutulub. Hazırda dairə üzrə seçici sayı 49 min nəfərdən çoxdur.

Vurğulanıb ki, Mərkəzi Seçki Komissiyası tərəfindən seçki məntəqələri seçkiyə aid bütün zəruri əşyalarla təmin olunur.

O əlavə edib ki, seçki dairəsi üzrə sağlamlıq imkanları məhdud olan seçicilərin səs vermələri üçün şəraitin yaradılması məqsədilə Mərkəzi Seçki Komissiyası tərəfindən seçki məntəqələrinin girişlərində pandusların quraşdırılması nəzərdə tutulub.

“Namizədlərin təbliğat və təşviqati üçün seçki dairəsi üzrə bütün seçki məntəqələrinə yaxın ərazilərdə təşviqat lövhələri quraşdırılıb. Eyni zamanda, əvvəlki illərdə olduğu kimi, seçki dairəsinin ərazisində təbliğat məqsədilə bir qapalı və bir açıq yer müəyyən edilib. Seçicilərin seçki məntəqələrinə rahat, maneəsiz gələrək səs vermələri məqsədilə seçki dairəsi üzrə bir neçə seçki məntəqəsinin dislokasiyasında əlavə və dəyişikliklər aparılıb. Əvvəlki seçkilərdə olduğu kimi, bu dəfə də seçki dairəsi üzrə 10 seçki məntəqəsində veb-kameraların quraşdırılması nəzərdə tutulub.

Seçkilərdə vətəndaşların seçki hüququnu pozan hərəkətlərdən (hərəkətsizlikdən) və qərarlardan şikayətlərin araşdırılması məqsədilə dairə seçki komissiyasının (DSK) nəzdində 3 nəfərdən ibarət ekspert qrupu yaradılıb. Bu günədək seçki dairəsi üzrə ümumilikdə 400-dən çox müşahidəçi qeydə alınıb”, - deyə Natiq Əliyev vurğulayıb.

Treninqi aparan 8 saylı Binəqədi birinci seçki dairəsi dairə seçki komissiyasının katibi Məhəmməd Əliyarov iştirakçılara MSK tərəfindən hazırlanmış slaydların və əyani vəsaitlərin köməyi ilə iştirakçılara səsvermə günü məntəqə seçki komissiyaları üzvlərinin rol və vəzifələri, səsvermə otağının təşkil edilməsi qaydası, seçki günü müşahidəçilərin hüquqları, səsvermə günü məntəqənin açılması və s. barədə məlumat verib. Təlim iştirakçılarına bununla bağlı yaddaş kitabçası da təqdim edilib.

Treninqdə dairə və məntəqə seçki komissiyalarının üzvlərinin sualları da cavablandırılıb.

Qeyd edək ki, treninqlər 9 saylı Binəqədi ikinci, 10 saylı Binəqədi üçüncü, 11 saylı Binəqədi-Qaradağ seçki dairələrində də keçirilir.