Bu gün Ombudsman təsisatı üçün olduqca əhəmiyyətli gündür. Pandemiyadan sonra ilk dəfədir ki, biz yenidən Bakıda görüş keçiririk.

AZƏRTAC xəbər verir ki, bunu Asiya Ombudsmanlar Assosiasiyasının iclasından sonra jurnalistlərə açıqlamasında Azərbaycanın insan hüquqları üzrə müvəkkili (ombudsman) Səbinə Əliyeva söyləyib.

Ombudsman qeyd edib ki, bu görüş həm Azərbaycana, həm də Assosiasiyaya üzv olan ölkələrə təcrübə mübadiləsi aparmaq, eyni zamanda, gələcək fəaliyyəti müəyyənləşdirmək üçün böyük fürsətdir. “Bu günlərdə Azərbaycanın uzun illər işğal altında olmuş ərazilərinə ziyarət nəzərdə tutulub. Qonaqlar müharibə cinayətləri törətmiş Ermənistan hakimiyyətinin Azərbaycana qarşı həyata keçirdiyi işğalçılıq siyasətinin nəticələrini öz gözləri ilə görəcəklər”, - deyə Səbinə Əliyeva diqqətə çatdırıb.