Multikulturalizm məkanlarından biri olan Azərbaycan həm dinlərarası, həm də cəmiyyələrarası dialoqun mərkəzinə çevrilib. Ölkəmiz növbəti dəfə mühüm tədbirə ev sahibliyi edir. “İslamofobiya irqçiliyin və ayrı-seçkiliyin spesifik forması kimi: Yeni qlobal və transmilli çağırışlar” mövzusunda beynəlxalq konfransda 30-dan çox ölkədən tanınmış elm adamları, beynəlxalq təşkilatların ekspertləri, din xadimləri və qeyri-hökumət təşkilatlarının nümayəndələri iştirak edəcəklər. İslamofobiya ilə bağlı beynəlxalq konfransın keçirilməsinə və yeni yanaşmalara böyük ehtiyac var.

AZƏRTAC xəbər verir ki, bu fikirləri Bakı Beynəlxalq Multikulturalizm Mərkəzinin İcraçı direktoru Rəvan Həsənov Bakıda keçiriləcək “İslamofobiya irqçiliyin və ayrı-seçkiliyin spesifik forması kimi: Yeni qlobal və transmilli çağırışlar” mövzusunda beynəlxalq konfransla bağlı təşkil edilən brifinqdə ifadə edib.

Rəvan Həsənov qeyd edib ki, islamofobiya artan tendensiya kimi narahatlıq doğurur. “Təbii ki, islamofobiya Azərbaycanı da narahat edən məsələlərdəndir. Azərbaycan İslam tarixinin və mədəniyyətinin bir parçasıdır. Dünyəvi ölkə olan Azərbaycan multikultural ənənələri ilə seçilir”, - deyə o vurğulayıb.