Noyabrın 3-də Azərbaycan Rəssamlar İttifaqında Gənc Rəssamlar Birliyinin üzvi Emin Aslanovun “44 Zəfər plakatı” adlı fərdi sərgisi açılıb.

AZƏRTAC xəbər verir ki, sərgidə Azərbaycan Rəssamlar İttifaqının sədri, Xalq rəssamı Fərhad Xəlilov müəllifi təbrik edərək, Zəfər Gününün birinci ildönümü ərəfəsində açılan bu sərginin qürurverici olduğunu söyləyib. Bildirib ki, 44 gün davam edən Vətən müharibəsində Azərbaycan Ordusu düşmən üzərində böyük qələbə qazanaraq 30 illik torpaq nisgilinə son qoydu və millətimizə qalibiyyət yaşatdı.

İştirakçıları Zəfər Günü münasibətilə təbrik edən Milli Məclisin Mədəniyyət komitəsinin sədri Qənirə Paşayeva bildirib ki, Müzəffər Ordumuz Ali Baş Komandanın rəhbərliyi ilə torpaqlarımızı azad etdi. Bu azadlıq tarixi ədalətin bərpası, xalqın, özəlliklə gənc nəslin psixoloji ovqatı baxımından fövqəladə önəm daşıyır: “Bu Qələbə ilə milli qürurumuz qorundu, bu Qələbə ilə özümüzə gəldik, özümüzü tanıdıq. Bizi dünya da yaxşı tanıdı”.

Q.Paşayeva deyib ki, Emin Aslanov yaradıcı yeni nəslin nümayəndəsi olaraq, həm müharibə, həm də postmüharibəni gözəl və özəl detallarla, zəriflik və incəliklə canlandırıb: “Emin Aslanovu bu uğurlu layihə münasibətilə təbrik edir, bu nəcib işdə ona dəstək duran hər kəsi alqışlayıram. Qələbəmizin birinci ildönümü münasibətilə təşkil edilən bu sərgi yaddaşlarda dərin iz buraxacaq”.

Bildirilib ki, Eminin yaratdığı “44 Zəfər plakatı” Vətən müharibəsinin ən yaddaqalan şüarını, Ali Baş Komandanımızın qətiyyətli əzmini, Müzəffər Azərbaycan Ordusunun ölçüyəgəlməz qüdrətini əks etdirir. Bu plakatlar real, hamımızın qürurla yaşadığımız tarixi günlərin sənədli faktlarıdır.

Qənirə Paşayeva bu sərginin işğaldan azad edilmiş bütün bölgələrdə təşkil olunmasını arzulayıb.

Tədbirdə Əməkdar incəsənət xadimi, sənətşünaslıq üzrə fəlsəfə doktoru Ziyadxan Əliyev, Azərbaycan Rəssamlar İttifaqı sədrinin müavini Rafiq Kərimov çıxış edərək sərginin əhəmiyyətindən danışıblar. Bildirilib ki, Zəfər plakatlarında Ali Baş Komandanın qələbəyə səsləyən dəmir iradəsi, salnamə yazan Şuşa fatehləri, “Bir millət, iki dövlət” şüarı, torpaqlarımızı işğaldan xilas edən qalib Azərbaycan general və əsgərləri, eləcə də digər yaddaqalan fəxarətli məqamlar əksini tapıb.

Sonra iştirakçılar sərgi ilə tanış olublar.

Müəllif plakatlarda müharibə mövzusunu tünd rənglərlə, işğaldan azad olunmuş ərazilərə aid əsərləri isə ağ fonda təqdim edib. Uğurlu kompozisiya həlli, fikir bütövlüyü, bədii ideyanın tamlıqla ifadə olunması bu plakatları birləşdirən əsas cəhətlərdir.