Ötən il Ekologiya və Təbii Sərvətlər Nazirliyi tərəfindən bir sıra reintroduksiya layihələri həyata keçirilib. 2023-cü ildə də həmin layihələrin həyata keçirilməsi nəzərdə tutulub. Buraya ceyranların, bezoar keçilərinin, köpgərin və bizonların reintroduksiyası daxildir. Həmçinin "Qırmızı kitab"a daxil olan nəcib maralın da öz tarixi areallarına reintroduksiyası ilə bağlı layihələr həyata keçirilir. Bu addımlar IDEA İctimai Birliyi və Vəhşi Təbiəti Müdafiə Fondu ilə birlikdə atılır.

Keçən ilin oktyabrında ölkə başçısının iştirakı ilə 33 baş ceyranın təbiətə buraxılması prosesi baş tutdu. Onların monitorinqi davam edir. Monitorinqlər nəticəsində Füzulinin Alıxanbəyli kəndində ceyranlar müşahidə olunub. Hazırda həmin ərazidə monitorinqlər davam edir. Bu, müsbət haldır. Cəbrayıl ərazisindəki ceyranların digər rayonda da müşahidə olunmağı onların əraziyə uyğunlaşmağını göstərir. Onu da qeydə etmək istərdim ki, indiyə kimi tarixi areallarına buraxılan ceyranların sayı 350 başı keçib.

AZƏRTAC xəbər verir ki, bunu Bioloji Müxtəlifliyin Qorunması Xidmətinin rəisi Firuddin Əliyev deyib.

Xidmət rəisi bildirib ki, müsbət addımların atılmasına baxmayaraq, bəzən brakonyerlik hallarına da rast gəlinir: "Buraya Ağgöl və Qızılağac milli parklarını aid etmək istərdim. Təəssüf ki, milli parkın ərazisində ovun qadağan olmasına baxmayaraq, son dövrlərdə bu kimi neqativ hallara rast gəlirik. Neqativ halların qarşısının alınması məqsədilə Daxili İşlər Nazirliyinin xüsusilə Su Polisi İdarəsinin əməkdaşları ilə birlikdə Ağgöl və Qızılağac milli parklarında gücləndirilmiş rejim tətbiq olunur. Həmin rejim çərçivəsində əlavə stasionar postların quraşdırılması, əlavə heyətin əraziyə cəlb olunması, müəyyən maneələrin yaradılması, xəbərdarlıq lövhələrinin quraşdırılması kimi tədbirlər davam edir. Belə olan hallarda həmin vətəndaşlara qarşı qanunvericilik çərçivəsində ciddi cəzalar tətbiq olunur.

İki həftə əvvəl qanunsuz olaraq çöl donuzunun ovlanması faktı aşkarlanıb. Bununla bağlı da tədbirlər həyata keçirilib. Hazırda da Qızılağac və Ağgöl milli parklarında monitorinqlər davam edir. Vətəndaşları belə əməllərdən çəkinməyə səsləyirəm. Ümumiyyətlə isə vətəndaşlara brakonyerlik halları ilə qarşılaşdıqda mütləq Ekologiya və Təbii Sərvətlər Nazirliyinin əməkdaşlarına xəbər vermələri tövsiyə olunur"