Səhər saatlarından Nərimanov rayonu, Fətəli xan Xoyski küçəsi, 5 (metronun “Gənclik” stansiyasının yanı) ünvanındayıq. Burada Kənd Təsərrüfatı Nazirliyinin tabeliyindəki “Aqrar Tədarük və Təchizat” ASC-nin təşkilatçılığı ilə “Mövsüm yarmarkası” keçirilir. Noyabrın 28-dən başlayan həftəsonu yarmarkası şənbə günü də alıcı və satıcıların qızğın alış-verişinin getdiyi məkandır.

AZƏRTAC-ın əməkdaşları yarmarkanın təşkili və qiymətlər barədə alıcı və satıcıların fikirlərini öyrəniblər.

Builki yarmarkada 30-a yaxın regiondan 55-dək fermer 120-yə qədər çeşiddə kənd təsərrüfatı və qida məhsullarının satışını həyata keçirir. Səhər saat 09:00-dan 19:00-dək təşkil olunan “Mövsüm yarmarkası”nda fermerlər piştaxta, tərəzi və digər lazımi avadanlıqla ödənişsiz şəkildə təmin olunurlar. Satıcılar da yaradılan şəraitdən razı görünür.

Yarmarkanın təşkilində əsas məqsəd yerli fermerlərin məhsullarının bazara çıxışını dəstəkləmək, onları alternativ satış nöqtələri ilə təmin etmək, eyni zamanda, şəhər sakinlərinin təbii, yerli və sağlam kənd məhsullarına əlçatanlığını artırmaqdır.

Satıcı fermer Qəhrəman İbrahimov AZƏRTAC-ın müxbiri ilə söhbətində bildirib ki, Astara rayonundan sitrus məhsullarının satışı üçün yarmarkaya gəlib: “Üç çeşiddə naringi, kivi, iki çeşiddə limonlarımızı gətirmişik. Qiymətlər bazara nisbətən aşağıdır. Bazarda təklif olunan naringinin bir kiloqramını biz 1 manata, kiviləri 2-3 manata satırıq. İlk həftəmizdir, əvvəlki illərə nisbətən alıcılıq zəifdir. Ümid edirəm alıcıların sayı çoxalacaq”.

Lənkəranın Hirkan qəsəbəsində çay plantasiyası olan sahibkar xanım Xəyalə Abdullayeva bu il yarmarkaya ilk dəfə gələnlərdəndir: “Çayımız Lənkəranın Hirkan qəsəbəsində əkilib-becərilir, sexdə paketləşdirilir və satılır. Tam təbiidir, heç bir qatqısı yoxdur, rəngləndirici kimyəvi maddələrdən istifadə edilməyib. İlk dəfədir yarmarkada iştirak edirik. Çayımızı alanların fikirləri yaxşıdır, bəyənilir. Bu da bizi çox sevindirir”.

Şəhər sakinləri də yarmarkanın təşkili səviyyəsini bəyəndiklərini və qiymətlərin çox sərfəli olduğunu qeyd ediblər.

Bakı sakini Rübabə Muradova deyib: “Qiymətlər normaldır, fərq ucuzluqdadır. Məhsul da keyfiyyətlidir. Mütəmadi olaraq yarmarkaya gəlirik. Razı olmasaq gəlmərik”.

Bakı sakini Tariyel Şirinov yarmarkaya ilk dəfə gəldiyini qeyd edib: “Yaxşı təşkil olunub. Fermerlərə dəstək olurlar, onların məhsullarını Bakıya gətirirlər. Belə olanda biz də razı qalırıq, alıcılar da”.