Neft-qaz sahəsində böyük uğurlar əldə edən Azərbaycan “yaşıl enerji” üzrə də mühüm layihələr həyata keçirir.
×
Neft-qaz sahəsində böyük uğurlar əldə edən Azərbaycan “yaşıl enerji” üzrə də mühüm layihələr həyata keçirir.
Azərbaycanda enerji infrastrukturunun inkişafına, neft-qaz sahəsində əldə olunan uğurlara baxmayaraq, “yaşıl enerji” sahəsinə xüsusi diqqət göstərilir və böyük layihələr həyata keçirilir.
Bu sözləri BP şirkətinin hasilat və əməliyyatlar üzrə icraçı vitse-prezidenti Qordon Birrel AZƏRTAC-a açıqlamasında deyib.
Q.Birrel bildirib ki, Azərbaycan iqtisadiyyatına investisiyaların davamlılığı enerji infrastrukturunun stabil inkişafı, neft-qaz resurslarının hasilatının daimi xarakter daşıması, həmçinin “yaşıl enerji”yə keçidlə bağlı genişmiqyaslı layihələrlə əlaqədardır. BP şirkəti fəaliyyəti müddətində Azərbaycan iqtisadiyyatına 84 milyard dollar investisiya yatırıb. Şirkət Azərbaycanda həyata keçirilən neft-qaz layihələrini dəstəkləməkdə davam edəcək. Bu il Azərbaycanla əməkdaşlığın 30 illiyidir. Belə uzun müddətli əməkdaşlıq Azərbaycan iqtisadiyyatının sabitliyinin göstəricisidir.
BP rəsmisi dünya əhalisinin enerji ehtiyacının ödənilməsi ilə bağlı da danışaraq qeyd edib ki, bu məsələlərin həlli üçün ilk növbədə böyük investisiyalar və qaz nəqli sistemləri tələb olunur. Qaz tədarükünün qiymətində də tənzimləmələr aparılmalıdır. Növbəti mərhələdə tədarükün etibarlı olması, şaxələndirilməsi və təhlükəsizliyin təmini istiqamətində işlər görülməlidir. Gələcək üçün planlarda “yaşıl enerji sahəsinə investisiyaların artırılması nəzərdə tutulub.