COP29 çərçivəsində Bakıda keçirilən Şəhərsalma və iqlim dəyişikliyi üzrə yüksəksəviyyəli nazirlərin görüşünün yekununa həsr olunmuş mətbuat konfransı keçirilib.

AZƏRTAC xəbər verir ki, BMT-nin Məskunlaşma Proqramının (UN-HABITAT) kommunikasiya üzrə direktoru xanım Katerina Bezqaçinanın moderatorluğu ilə keçən tədbirdə UN-HABITAT-ın icraçı direktoru Anaklaudia Rossbax COP29-un yüksək səviyyədə təşkilinə görə təbriklərini çatdırıb. O bildirib ki, üçüncü dəfə keçirilən Şəhərsalma və iqlim dəyişikliyi üzrə görüşdə nazirlər, yerli liderlər, inkişaf bankları və maraqlı tərəflər gələcəkdə daha yaxşı şəhər həyatı üçün səyləri birləşdirməklə bağlı müzakirələr aparıblar. Bildirilib ki, müzakirələrdə tərəflər Paris Sazişi və Dayanıqlı İnkişaf Məqsədlərinin tələblərinə cavab vermək üçün addımların atılmasının vacibliyini vurğulayıb, bunun üçün çoxsəviyyəli və çoxsektorlu iqlim fəaliyyətlərinin əhəmiyyətini qeyd ediblər.